董建華講咗句堅決反對官商勾結後，曾俊華即刻為數碼港解畫，爆出當年資訊科技局局長鄺其志曾對呢個計劃有疑問，令鄺神童頓成反「利益輸送」英雄。
八方嘅官場好友就話報界朋友全部捉錯用神，真正反對者係當年做庫務局局長嘅俞宗怡。鄺神童提出嘅所謂問題其實係好正路，唔係反對；最重要係佢當年負責呢個計劃，如果冇佢同意，根本冇可能上得到行會。
鄺神童離開政府，係因為當時聯交所搵佢去做阿頭，年薪千萬，吸引力咁大，加上港府高層首肯，於是順利過檔，並冇憤然離職，大家唔好搞錯喎。
至於俞大姐，仕途就行人止步。阿董搞高官問責制之後，只係做番個工商及科技局常任秘書長，不過政務官中人不論大小，都對佢阿姐好尊重，事關佢做事堅守原則，又敢言，佢唔贊成小部長制，認為對政府運作有害而無利，曾經喺政務官大會上，向煲呔曾當面質詢，真堪稱官場「鐵娘子」。
（圖）俞小姐（左）噚日出席知識產權署開放日，同唐唐好好傾。
傳真︰2623-9278
電郵︰