阿董上神枱，連日成為全港至hit話題！由中環至天水圍，由CEO至茶餐廳抹地阿嬸，都識得笑笑口蹺埋手，睇吓阿董識唔識解中方主人呢條名上實下嘅籤，自己引咎稱病辭職！
本地土共左佬，重喺處死撐，猛話阿董做「政協副主席」，並非上神枱，而係顯示「中央」對廢董高度重視！既然係咁，點解澳門何厚鏵又冇份？唔通胡溫故意冷待何厚鏵？曾鈺成話：胡溫咁係挺董？連佢自己都招認，跟阿董搵食，只有辱，沒有榮，重當六百萬港人係白癡？
廢董榮升「國家領導人」行列，可以將佢過往七年「治港」經驗，同「中央」分享，例如：全國應該建幾多個高科技城市？上海房地產炒到咁熱，幾時會實施「八萬五」？定係前年沙士瘟疫，以廢董嘅「管治智囊」，中國衞生部長張文康及北京市長孟學農，根本毋須「問責」落台？又或者，大連、天津、廈門，係咪應該發展為「西藥港」？難得「國家」高度賞識，廢董若然可以將佢七年「治港」寶貴經驗，多多在政協人大，宣傳推廣，大鳴大放，咁偉大祖國，就前途一片光明咯！
廢董做咗政協副主席，從此唐曾章（唐英年、曾蔭權、李國章）三大熱門候選人，即時可以合法奪權，在各自部門環頭瞓身表演，因為胡溫已經將廢董搬開咗，以免妨礙視線！阿董經已日日七至十一，忘我工作，忙到成隻牛咁，加埋平時日日趕春茗、忙剪綵、出席親中社團酒會，現時重要加重負擔，要佢參與領導埋國家，叫佢兼多份要職，而唔係唔想佢辭職唔撈嘅話，咪即是想攞阿董命？董伯呀，重唔識做？要胡溫落手炒人，咪即是叫中央做足醜人？
傳真︰2623-9278
電郵︰