星期日米杜士堡打和查爾頓二比二場英超聯，賽後最開心相信係米堡嘅十九歲前鋒丹尼格拉咸。因丹尼格拉咸喺嗰場波後備入替後，攞到自己喺英超聯嘅第一球不特止，重協助球隊追成二比二平手；而最重要嘅係佢憑呢球獲得球會續約。事緣米堡一直冇打算同今季後滿約嘅丹尼格拉咸續約，但喺星期日場波，領隊麥卡倫睇見佢咁博，俾人踢爆鼻都同球隊搶番一分，喺賽後就即刻話同佢續約。
東北虎米堡都算係超聯球隊中嘅異數，喺多間球會都重用外援，佢哋就好注重培養英格蘭土炮，新人輩出，好似新晉英格蘭國腳唐寧同埋新星翼鋒占士摩利臣等，𠵱家重有丹尼格拉咸㖭！聽講話米堡喺○四年奪得青年組足總盃嘅成員中，重有好多卧虎藏龍，嘩！米堡容乜易變「英格蘭阿積士」！
祖爾獲熱刺加薪挽留
講開阿積士，呢支荷蘭班霸今季嘅表現就麻麻，搞到教練朗奴高文都要辭職，而有傳佢哋嘅目標係熱刺嘅荷蘭籍領隊祖爾。據講熱刺為留住祖爾，準備將佢人工加倍，令佢嘅年薪過二百萬鎊（約三千萬港元），所以話，做領隊嘅壓力雖然大，但如果教波教得好，真係唔愁出路㗎！
謝拉特老烏陰謀論
謝拉特噚晚個烏龍波累到利記被迫和，重冇咗個聯賽盃。我求大俠諗起較早前謝拉特講過話如果要佢留效「利記」，今季至少要捧一個盃先得。咁嗰球烏龍波會唔會係特登嘅呢？重要咁啱係對住想簽佢嘅車仔㖭！不過，我估謝拉特唔會咁做啩，話晒佢都係飲利記鮮奶大㗎嘛。
奇連士文教唔掂？
德國隊教練奇連士文日前呼籲德國足總，邀請前國家隊教練福士擔任技術總監。福士一聽即刻話「我願意」，但就不滿足總要佢○六年先就任；咁就急死奇連士文嘞，佢要求有關當局唔好搞搞震，盡早畀福士返嚟幫手。可能奇連士文自知執教經驗淺，有福士「照」住會好啲。
卡斯辛奴死性不改
前晚羅馬作客巴勒莫，「王子」托迪停賽造就卡斯辛奴做代隊長。由於場波喺雨中進行，對技術型嘅卡斯辛奴嚟講當然冇得發揮，可能咁令佢好躁，成場冇表現不特止，重不斷鬧球證、敵將，更狼到走去對方後備席向人哋教練古杜連發老脾，後生仔再唔改鋪牛脾氣，難當大任。