近年國內出現民工荒，國家統計局局長李德水話係因為工資偏低所致，呼籲老闆加人工。八方日前同與「哥哥」同名同姓嘅建滔化工主席張國榮傾談，講到內地搞廠，佢話唔可以再諗住壓低工資。佢間公司近期業績理想，國內員工都獲發十四個月糧，重有薪加，佢笑稱，通常喊缺人嘅企業，多數係嗰啲工資低、福利差，出糧又唔準時嘅企業。
做鐘表嘅工業總會副主席劉展灝就話，近年出現勞工短缺，係因為農民收入增加，年輕人留喺家鄉亦有發展機會；重有就係唔少內陸省分外出招商，外商亦開始去內地投資，增加咗當地就業機會。中小企業總會主席陳山河就認為，民工工資唔算低，而且佢哋包食包住，香港員工雖然有六千幾蚊人工，但就冇呢啲福利喇。
傳真︰2623-9278
電郵︰