踏入3月，係業績公布季節，買定個別優質股博有好成績公布，分分鐘可以執番多少，例如經紀黃品題的魏橋紡織（2698），噚日公布04年全年業績，真係飲得杯落，盈利比去年上升52.4％，有8.26億元，兼夾有0.25元股息派。難怪魏橋噚日再升4.9％，收12.75元，成交7937萬元。
經紀黃另一隻心水股，係相當冷門的路訊通（888），聽聞04年全年業績有望轉虧為盈。雖然路訊通尚未定出公布業績日期，但公司年結日為12月31日，睇嚟都係差唔多時候。
路訊通03年虧損，原因唔難明，一來係沙士影響；二來係大陸廣告媒體尚未賺到錢。但在04年上半年，公司業績已經明顯好轉，大陸業務盈利增長尤其優異。
至於香港方面，如果經常坐巴士，應該會發現因為經濟好咗，而佢哋嘅廣告亦多好多，所以如無意外，路訊通嘅全年業績應該唔錯，不妨收集定等派成績表。
路訊通股價近期拾級而上，噚日升3.41％，收0.91元。
慕容小初