憑一身妖氣打扮上位嘅日本男星成宮寬貴曾經同男星妻夫木聰合演日劇《ORANGEDAYS》，稍後佢又會參演電影《NANA世上另一個我》，事業可謂一帆風順，但佢最近就被最新一期日本雜誌《BUBKA》翻舊帳，搵到佢十四歲到同志吧唱K狂歡嘅相片，枱頭重放滿香煙同酒。
現年二十二歲嘅成宮寬貴家境複雜，佢媽媽一早過世，令佢性格變得反叛，讀中學時已經成日流連新宿二丁目一帶嘅同志吧。成宮憑住標致嘅五官，深得唔少阿叔歡迎，據《BUBKA》所講，當年十四歲嘅成宮同過一名男教師同居，而呢位男教師重負責照顧成宮嘅生活，喺佢身上使咗唔少錢，當日成宮就同埋呢位男教師到咗新宿二丁目一間同志吧唱K，而成宮面前嘅枱上重放咗一杯酒、香煙以及打火機，令人懷疑佢未成年就吸煙飲酒。後來呢位男教師用盡所有積蓄，養唔起佢先至分手。
另外，曾替日本組合SMAP上年大賣細碟《在這世上只有一枝的花》作曲同填詞嘅男歌手槙原敬之，一直被指為同性戀者。最近佢被發現同一名女性到橫濱中華街食飯約會，態度親密。