滙控（005）去年賺922億元，升35%，同市場所預期由910億元至970億相若，即係「冇驚喜」，市勢在宣布前走軟，早市曾升過100多點，最高見14272，但午後曾倒跌，結果收市仍有38點進帳，收報14195，成交重係好活躍，有228億元。
滙控在現貨收市後宣布，期指曾一度插得好急，最低見14025，跌35點，到尾段才由低位回升，結果收14100，升40點，低水95點，係反映滙控、恒生（011）同一眾藍籌股派息嘅因素。噚日恒指升到14272的高位，已好接近去年12月14330的阻力位，短期市勢料會轉趨反覆，可以20日線（噚日13876，上升中）為止賺位，繼續持貨。
國企個勢好勁，在石油同保險股帶動下，國指又再升127點，報收5152，今次突破5000大關阻力，且有大成交配合，以大圓底形態衡量，量度升幅目標係5350。
中國鋁業（2600）長升長有，3個禮拜前推介，當時股價4.325元，噚日高收5.25元，升幅21%。
中鋁短期升幅雖大，但相比國際同業，股價仍屬偏低，中線持有，仍可以6元為獲利目標。
上海石化（338）同吉林化工（368）嘅升勢一浪高過一浪，上石化已擇吉本月23日派成績表，相信會有喜訊。上石化同吉化股價今個月內升勢將會轉急，保守估計在現水平起碼會再有20%到30%嘅升幅。
除國企外，中資股呢輪亦見有基金大手吸納，佢哋噚日目標就指向光大控股（165），掃到上3.725元，升3.4%，成交好墟冚，有2400萬股，比上周五大增4倍，消息話光大銀行策略性入股已有眉目，光控資產升值，股價亦會水漲船高。
光控噚日破位而上，成功擺脫3條短期平均線嘅糾纏，重衝破由去年11月伸延嘅下降軌阻力，初步上升目標4.20元，中線有機會見5字頭。
光控持有光銀21.39%同光大證券49%，以帳面資產入帳，04年6月底止，光控每股帳面值3.10元，光銀策略性入股作價傳係帳面值1.8倍，則光控每股已值5.20元，日後光銀同光證分拆上市，光控每股實值更可大幅上升。
郭兆誠