個市先升後穩，恒指最高曾升116點，埋單升幅收窄到38點。昨日市場焦點，盡在收市後派成績表嘅滙控（005）。滙控最高134元，叫做收133.50元，升0.50元。倫敦市場初步對滙控盤數，反應唔係咁好，短期個市可能借滙控嘅宣布，調整一吓，但估計幅度唔會太大。
滙控C輪：滙控C輪早段搶過一輪，到收市，埋單價有升有跌。升得最多嘅係3615，收0.121元，升幅達19.8%，跌得最多嘅係4660，收0.10元，冇咗13%。兩隻輪交投唔算勁，唔適宜做行情。熱門貨4441收69仙，跌5.5%。
滙控派息0.27美元，約2.10港元，本月16日除息。炒C輪，要計埋呢個因素。
4441負溢價2.0%，當滙控已除息131.40元計，即負溢價縮減到0.47%。早前，渣打（2888）派成績表後，股價亦係先挫一挫然後彈番。滙控若下跌，跌多一陣，博佢升番，就應該買C輪，太近期嗰啲咪要，要遠期啲，4441係理想對象。
恒指窩輪：滙控股息2.10元，相等於恒指75點，即係話月中除息嗰陣，滙控如果實際唔升唔跌，會拖低恒指0.53%，𠵱家炒恒指C輪，要將實際溢價打大0.53%。
買恒指P輪，則將溢價扣減0.53%。短期內，揸恒指P輪有啲着數，短炒對象有3543與3748。
中企P輪：國企指數升127點，升幅達2.5%，由中石化（386）、中石油（857）、國壽（2628）等帶動。高價追呢啲國企同中企指數C輪，有風險。
不過揸中企指數P輪亦諗唔過，唔係溢價太高，就係交投太靜，勉強可以諗吓嘅，係3729。
章盛