已有十六年歷史嘅美國長壽電視卡通片《阿森一族》，喺英國家喻戶曉，最近《阿森》就喺當地電視台搞嘅「一百部最佳卡通選舉」中勇奪冠軍。
最近英國第4電視頻道，搞咗個「一百部最佳卡通選舉」，由當地觀眾選出心目中嘅最佳卡通片，當中包括電視同電影卡通，不過頭三名都畀美國嘅電視卡通霸晒。第一名係已經有十六年歷史嘅溫情卡通《阿森一族》，第二名就係以貓同老鼠做主角嘅經典卡通《湯姆與謝利》，第三名就係以臭寸同意識出位聞名嘅《衰仔樂園》。至於最威嘅英國卡通就係《超級無敵掌門狗》，但只係排第十五。
至於卡通電影方面，最威水係迪士尼同彼思動畫合作嘅代表作《反斗奇兵》同《反斗奇兵續集》，一齊獲選第四位，而兩間公司合作嘅近作《超人特工隊》亦打入第九位，至於另一套彼思賣座作品《海底奇兵》就排第十四位。
而最受歡迎嘅日本卡通，就係排第八位、宮崎駿嘅《千與千尋》；而日本漫畫家大友克洋親自執導嘅代表電影作品《阿基拉》亦唔弱，獲選第十六位，成績重好過第二十一位、宮崎駿另一作品《幽靈公主》。
至於較為舊嘅卡通亦冇被觀眾遺忘，好似《賓尼兔》就排第十位，《大力水手》排喺第二十三位，而《木偶奇遇記》就排第二十五位。