馮仁昭四圍超：
張可頤去P男友樓下呆等兩粒鐘

張可頤舊年曾經跟形象指導郭慶彬（Ricky）傳緋聞，雖然Ricky當時帶埋模特兒女友周倩圮出嚟澄清佢同張可頤嘅關係，但前晚十一點幾，當張可頤出席洲際酒店舉行嘅「香港癌症基金會周年餐舞會」時，馮仁昭竟然見到Ricky同一個女性朋友，坐住部七人車停喺洲際酒店門口，等張可頤等足兩個鐘，話佢哋冇嘢真係幾難叫人相信。
張可頤上車之後，估計佢同Ricky應該重有下文，但佢哋喺馬己仙峽道放低個女性朋友時，發現有傳媒追訪，於是各自返去太古城同西貢屋企，莫非傳媒破壞咗佢哋好事？

揼朋友心口捐錢
另外，張可頤前晚喺活動上表示，佢身為癌症基金會大使，諗住下個月二十號生日開番個慈善party，問佢會唔會搵佢同性好友鄧霓儀捐錢？張可頤話：「我會用我小小嘅影響力揼朋友心口。」

伊健阿佘拍劇被保安員趕走
鄭伊健同佘詩曼噚日喺又一城拍攝新劇《隨時候命》，因為冇申請場地，所以俾保安阻止拍攝，結果佢哋匆匆拍咗幾個鏡頭就離開。伊健飾演飛行服務隊負責策劃救人工作嘅角色，早前曾喺飛行服務隊總部接受訓練一星期。佢話好嚮往喺飛機救人嘅工作，可惜現實生活做唔到。

李恩宙電影公司製銅像悼念
韓國女星李恩宙上星期自殺身亡，佢主演嘅大膽裸露遺作《TheScarletLetter》（暫譯《紅字》）嘅製作公司，為咗紀念佢，最近計劃製作一個李恩宙銅像，有關方面亦諗住將銅像放喺李恩宙安葬嘅京畿道高陽市自由路清雅公園，希望fans日後去拜祭李恩宙時，順便望下個像。

喻可欣內地宣傳華仔頭痕
劉德華舊愛喻可欣早前推出回憶錄《情海星空--我與劉德華》，為咗宣傳呢本自傳，喻可欣日前喺媽咪陪同下去內地搞宣傳，反應唔錯，喻可欣話華仔曾經係佢生命中最重要嘅部份，讀者睇完本書就會明白佢點解咁講喎！不過呢部書出咗，華仔就肯定頭痕。