呢排除咗零售股當炒外，經紀黃話紡織股亦不容忽視，個別紡織股開始拾級而上，其中魏橋紡織（2698）在今日公布全年業績，有分析員估計盈利升幅可觀，可能高達5成咁多，因此今日不妨望多兩眼。魏橋上周五升2.5％，收12.15元，成交6191萬元。
經紀黃話，紡織股可炒的理由甚簡單，配額限制取消，以及棉價回落都係有利因素。雖然棉價去年波動，曾令投資者擔心魏橋的毛利率下降同埋存貨增加，但據講魏橋相對於其他行家，有關問題處理得比較好。
另外，經紀黃同時推介泰興光學（389），佢話隻股因批股不成，曾令股價受壓，但其後面對現實降配股價，就已經搞番掂。泰興今次以5.724元配股，雖然復牌首日股價一度急跌，但就企硬喺配股價樓上，跟住反彈回6元樓上。花旗出咗份報告，將佢目標價調高至8元樓上，以現價6.20元計，仍有不俗水位。
慕容小初