近幾年新盤售樓處都好興搵歐美靚女撐場,令參觀者眼前一亮,而最新一處可以讓市民眼睛大吃冰淇淋嘅地方,就係將軍澳蔚藍灣畔,物業啱啱開放現樓,重利用會所入口做臨時售樓處,兩位意大利籍嘅靚女模特兒,充當接待員,高䠷嘅身形,雪白嘅肌膚,吸引唔少途人目光,蘭西甚至見到有街坊要求合照,重要係兩公婆輪流影,跟住聽到太太喺老公面前大讚佢哋靚女,個先生好幽默咁回應,「平時望親靚女都俾你鬧,今次反而係你讚人?世界變咯!」
聽信和講,今次出動兩名意大利靚女,係為表達樓盤會所嘅意大利風格,佢哋主要周末先會現身。話說連在場做生意嘅經紀都好想同兩名女模合照留念,但因為跟開張單行唔開,兩姝六點後收咗工,令佢非常失落,誓言嚟緊星期六一定要補飛咁話。
賣地後個市,正如各界所料,旺得好緊要,早幾年已買樓嘅人就最開心,個個變晒樓市明燈,但另一班遲遲唔肯買樓嘅,就不斷唱個市好快爆煲。
蘭西同班業界人士吹水時,經常都傾呢個矛盾話題,一班前線經紀就話,情願個市有咁癲得咁癲,等佢哋可以搵快錢,一兩年後個市先爆,轉行都冇咁辛苦。
至於主管級,尤其喺呢行打滾十多廿年嘅老前輩,就比較無奈,樓市唔好,佢哋又冇辦法維持高收入,但係太癲又要捱貴舖租,最怕去得太急爆咗煲,就大家都冇得玩。
𠵱家個個區都有人炒樓,逢新盤都有炒家,搞到個市興旺到好似九七前咁,令想上車或換樓一族,好易產生𠵱家唔買,遲啲會買貴嘅心態。好似將軍澳中心換樓客恐錯失良機,不惜連租約購入三座中層F室,八百九十九呎,成交價三百零八萬,單位兩年升值兩成。
中原區智輝表示,將中今個月有成九十宗買賣,破晒紀錄,當中一成連租約,平均呎價三千六百幾,升咗一成。
上禮拜五兩批嚟自唔同公司嘅代理,喺清水灣道八號售樓處,即九龍灣其士大廈門口大打出手,搞到報警處理。發展商俊和物業發展總經理應日民噚日回應事件,話發生打鬥後,隨即同各代理阿頭開會,提醒佢哋訓練前線員工,要有職業操守,打架太唔理智,最後重語重心長咁勸勉班前線經紀,話賣樓嘅嘢細水長流,唔好因一時意氣誤咗自己嘅事業,口角動武解決唔到問題,只會顯得佢哋唔專業。
華置旺角Chic之堡最近拆售,呢個平時有不少年輕人逛嘅商場,最近就多咗唔少投資者注意。旺區商場要投資者買得落手,人流係其中一個重點,所以華置雖然決定要拆售,一樣落足心機幫個商場做宣傳,噚日就請咗組合歌手「女生宿舍」到現場,做吓宣傳,重到處派優惠券,十分落力。
對於一班地產界嘅投資者,女生宿舍到底係邊個打邊個,相信未必個個都知,不過就成功吸引到一班年輕Fans聚集,雖然為數唔多,場面都總算熱鬧。
Chic之堡首批拆售30個舖位,呎價二萬幾,成交期長達二百一十天,至今售出兩個。
電郵地址: