賓架Ｆ響應曾司長，五月就會誕下女嬰，佢話好有可能再生多兩個，盡吓香港女士責任喎。左丁山叫佢小心健康，安胎為上。你估係小兒科呀？賓架Ｆ係劍橋MBA，老公係劍橋博士，兩人嘅結晶品點會唔係精品？
不過賓架Ｆ話最近好激氣，因為一啲母校中文大學師弟反對中大國際化，寫大字報哭中大，又有一位大師兄崔少明（芝加哥大學化學博士）為文反對，睇到佢眼突突。賓架Ｆ話：「中大從來都雙語教學，劉校長話加強國際化，增加英語課程，又點會破壞中大傳統，全盤英語化呢？反對嘅學生、部份校友，究竟點諗？我識得嘅同年代（九十年代）校友都話要支持劉校長。」
賓架Ｆ係中大國際化人辦，出身逸夫書院，加入花旗銀行，後到劍橋讀書，受麥肯錫延攬，得客戶睇起，加入銀行，年紀輕輕，前途無限。佢認為今天之中大學生，可能誤會了劉校長之一番好意。
比賓架Ｆ早二十幾年畢業之校友又如何睇法？中大校友事務處網站留言板上，有一封六十年代崇基、聯合畢業生楊懷曾、劉爕明、唐福雄、李啟宇嘅信件。呢四位中大人與崔少明博士係同期崇基同學，看法完全唔同。楊懷曾佢哋點講呢？佢哋話：「中大如果將自己局限於只用中文（實際上是廣東話）為授課語言的環境裏，實難以促進中西文化交流。中大如果不能與時並進，不能自我增值或為港人爭取更高榮譽，或在弘揚中華文化方面作出新的貢獻，便有違創校的原意了。」
呢幾位老校友已屆退休年齡，支持中大雙語政策，增加英語教學，意見與展開事業不太久嘅賓架Ｆ相同，睇落支持劉校長嘅校友，係老中青三結合。