美股上周連升3日，周五杜指進帳93點，升得嚟段段有力。周二大跌174點，喺跟住3日共升231點收復有突。如果今日滙控（005）、恒生（011）成績表掂檔，恒指上破去年2月初高位14339（上周收14157）好閒事而已。
長實C輪：九龍灣賣地成績好，市場開始有正面嘅反應，大隻地產股諗得過，長實（001）睇好，上周五收74.25元，升0.50元，熱緊身，見番年頭高位77.75元，估計唔使太耐時間。
明日就踏入3月，太短期嘅長實C輪例如3、4月到期者，最好避開，交投縮細亦都唔方便短線炒作。𠵱家最熱門嘅係6月期，共有10隻，當中最活躍嘅係3544與3560比拼一下，3560輸蝕半個月壽命，有效槓桿率輸蝕少少（11.3倍與12.1倍之比），而溢價則着數2.4個百分點（2.2%與4.6%之比），引伸波幅亦輕微取勝。賭長實活躍C輪，3560靚過3544。
石油股窩輪：上周五3大石油股都有進帳，相關C輪出色。油股已愈來愈接近1年前高位，儘管油價升帶來刺激，油股再上些少都要唞唞氣，況且油價能否升個唔停亦有疑問，油股C輪唔值得高追，要造淡買P輪則亦冇得揀，中石油（857）有P輪4件，溢價過高，交投太少。中石化（386）與中海油（883）則連1隻P輪都冇。
章盛