阿仙奴呢排認真唔順，噚晚又俾修咸頓迫和。聯賽榜𠵱家落後榜首嘅車路士十分之多，重要打多對方一場。
屋漏兼逢連夜雨，阿仙奴噚晚又有皮利斯重傷，尹佩斯兩黃一紅要停賽，禮拜二對錫周三嘅足總盃第五圈重賽都未必贏梗。大家再睇吓佢長到離譜嘅傷兵名單（包括新增嘅皮利斯），就知道今季阿仙奴可能要四大皆空。
聯賽冇望，聯賽盃出局，歐冠盃十六強賽首回合又落後拜仁慕尼黑一比三，足總盃𠵱家亦唔太樂觀。難怪雲格賽後㷫到想食咗尹佩斯落肚：「我喺半場已經提醒過佢有黃牌在身，下半場對方一定會撩㷫佢……」點知嗰頭講完，尹佩斯喺五十二分鐘，因從後鏟人領埋第二張黃牌出場。另外，門將個問題亦始終困擾住阿仙奴，修咸頓追成平手嗰球波，又係門將列文出迎失誤所致。
阿仙奴問題多籮籮，馬會最新嘅英超聯奪冠賠率阿仙奴冷至八十倍，都幾難現奇迹！
費倫貴價入錯貨
費倫天拿歇冬入咗個貴價貨保真諾夫，點知一路都貨不對辦，淨係領過一面紅牌咁大把。噚晚打烏甸尼斯好難得入番球波，勢估唔到兩分鐘後就受傷抬咗出場，好彩事後有傳佢傷得唔重。更不幸嘅都重係教練索夫，佢一直對保真諾夫好大期望，點知一路都淨係得個失望二字。
英球證遭暫禁執法
英超球證甸恩被無限期暫停執法，因佢同一個賽馬賭博網站關係太密切，安排執法球證嘅公司話未得到合理解釋前，都唔會安排佢執法。個賽馬網站叫「arbitorsracing」，arbitors係西班牙文球證嘅意思。雖然個網站同足球無關，但都係小心啲好，德國黑哨事件已係辦喇！
高雲尼亞里藉口牽強
啱啱俾華倫西亞炒魷嘅雲尼亞里，雖然話自己應該負全責，但係個心就唔係咁諗。佢認為自己只不過係球會同球迷期望過高下嘅犧牲品，佢哋根本唔應該將球隊幻想成皇馬同巴塞隆拿咁話。我求大俠就唔同意喇！華倫係上屆西甲同歐協盃冠軍，有期望都唔過份吖！
晶片波千祈咪壞
最近有好多問題波，好似早前畢爾包就有球波明明過咗皇馬白界，但球證因睇唔到而判唔入；前日哈化對漢堡，後者亦有呢種遭遇。聽講九月喺秘魯嘅世少盃，會用裝有晶片嘅波嚟比賽，個波一過白界就響。呢個方法係好，但如果啲球員腳頭勁得滯，搞到塊晶片壞咗，唔知到時點算呢？