都市忙人懶剪髮，每次洗剪吹，閒閒哋坐你個多小時，周六、日還要「輪籌」。早年日本流行極速剪髮大賽，杯麵都未食完，髮型師Fing鉸剪兼三剪齊發，模特兒經已改頭換面。遊日時鼓起勇氣親身體驗，10分鐘，EwardScissorhands《幻海奇緣》就冇，言語不通雞同鴨講，剪了個學生頭而歸，給同事笑了個幾月。今日，本港首家10分鐘極速剪髮屋空降奧海城，小記找來慷慨就義的Alpha踩場親試，睇你究竟有姿勢時又有冇實際。
記者：陳慧敏 攝影：黃子偉
Model：Karie（D8）
6點排頭位
上星期ECHouse為試反應，安排為每日頭4位客人免費剪髮，但因為反應太熱烈，有人晨早6點就排定頭位等試剪，結果一剪便剪了二十多位。採訪當日都有長龍排隊，望住Alpha個頭評頭品足：「係佢啦！剪得幾好吖！排咁耐都抵啦！」
ECHOUSE
地址：九龍奧海城一期UG層K2號舖
收費：$50 營業時間：10:00am-10:00pm
網頁：www.ec-house.com.hk
查詢：25279706
日本好早就流行10分鐘「即食」理髮屋。OL食完飯、差15分鐘未見客，甚至朋友遲到冇碇去，都可以搵間「極速」飛髮舖執吓個頭，繼續見人。今日ECHOUSE，由「冇乜頭髮」的曾智偉剪綵，又有資深本地髮型師到新加坡上課取經，同聲同氣為港客剪髮，用完即棄的梳子及圍巾保持衞生，最過癮是全店淨剪乜都唔包，連收錢都要客人自己嚟，真係貼士都可以慳番！
入屋要望紅綠燈
ECHOUSE，E是代表Express，C是代表Cut，解作「極速剪髮」。踏入二百多呎、只得四個位子的店內，Karie跟Alpha望望頭頂紅綠燈：「綠燈一亮即刻剪得！」因為不設洗頭位置，也沒有吹頭服務，所有人統統「乾剪」。為保持衞生，髮型師幫Alpha圍上用完即棄的紙毛巾代替傳統毛巾。所有鉸剪、梳子、空氣吹洗機機頭，都放在紫外線消毒器中消毒，座位旁還有手用消毒器，給客人及員工使用。髮型師Peter說：「因為時間有限，目標為本，客人可以給我圖片，或者告訴我要怎麼個剪法。但我們不會為客人設計任何髮型。」
專心一意唔傾偈
只想修修個雞冠頂的Alpha當然早有準備，Peter拿起剪刀，不見期望中的花式鉸剪手，卻手勢純熟的盯着Alpha的頭髮剪呀剪，不時細心看看左右比例，七分多鐘已讓Alpha清爽起來，還有時間剩，才放慢動作左執右執。原來「極速剪髮」都有好多秘訣要遵守，例如如何順應客人髮質，衡量該剪多少；一般髮型屋將頭髮分成6個部份，他們就分成3個部份來修剪，這已省掉一半時間，造出來的層次效果，卻絕不遜色。Peter又說：「鬈髮最難剪。有人會洗濕個頭過來剪，但其實乾頭髮，甚至立咗頭都可以過來剪，一來我哋冇吹頭服務，二來會容易啲睇清楚個髮型。」
目標「梗有一間喺左近」
現時ECHOUSE在新加坡及馬來西亞，已開設約30間分店，其概念雖然來自日本，但其大本營則在新加坡，所有入職髮型師都得親到新加坡取經。未來他們還打算聯同僱員再培訓局及香港職工會聯盟培訓中心，聘請已受訓的學員成為專業理髮學徒，送往新加坡取經，增加戰力，以「梗有一間喺左近」為目標，在未來數月裏，在上環、北角、小西灣及尖沙嘴等主要地區多開幾家分店。
過程直擊
日本一千円QBHouse
http://www.qbhouse.co.jp/
內容跟概念與ECHOUSE差不多，使用即棄紙毛巾、梳子、消毒器跟空氣吹洗機吹走頭髮。現於日本全國已有分店274間，羽田機場都有分店，單是今個3月都有10間分店開幕，發展速度勢如破竹。收費每位一千円，貴過ECHOUSE喎！
10分鐘重可做啲乜？
家陣做事樣樣都講效率，10分鐘除了可以食碗公仔麵，做幾下收身體操外，還可以做啲乜？
10分鐘睇清睇楚
激光矯視在港已經非常普及，雖然由踏入醫院、填表、適應藥水等過程可能需時2-3小時，然而只需20分鐘，就可為近視1,500度以內的「近視精」回復大部份視力，平均一隻眼才10分鐘。雖則收費最少萬多元，仍大受歡迎。
香港激光矯視中心
查詢：26281111（尖沙嘴）
網址： http://www.hklasereye.com/
10分鐘有情人終成眷屬
同情人求婚成功，好心急好想即刻簽紙結婚。無奈婚姻註冊處非24小時營業便利店，等天光，實在難解躍躍欲結的心情。拿拿臨上網CLICK兩CLICK，網上打句YoudoIdo，10分鐘就有張結婚證書Print出來給你揸手。雖說是虛擬婚書，但有可愛、浪漫、典雅、清麗四個款式任擇，證書上我又已經跟你姓，當堂個心都定晒啦！
網址： http://www.livewed.com/wedding.html