袁詠儀（靚靚）與張智霖相戀了十三年，兩人感情雖然很穩定，但始終沒有結束愛情長跑共訂鴛盟，靚靚很清楚男友對婚姻有陰影，故從未有迫婚意圖，不過兩人卻有生孩子計劃，所以已不設防等待小孩子降臨，到有了孩子時就會正式結婚。
袁詠儀近幾年來專注在內地發展搵真銀，經常與男友張智霖（Chilam）相隔兩地，但兩人感情依然牢固，縱使早前男友發生過在泰國金魚缸沖涼事件，但靚靚對男友之信任從未改變過，所以這麼多年來亦從未意圖向男友迫婚，因為她深明只要兩人感情維繫得好，是否擁有一紙婚書，根本就不重要，除非有了小朋友就另作別論。
靚靚與Chilam都喜歡小孩子，所以將來他們的家庭都希望可以有幾個小朋友，靚靚說：「生孩子都要講緣份，冇得迫，所以我哋都係抱住順其自然心態，𠵱家我哋係冇設防，如果真係有BB，咁咪去註冊結婚囉！我唔會去迫Chilam同我結婚，因為佢身邊有好多人離過婚，包括自己父母在內，所以佢對結婚呢方面，其實係有恐懼感，我會等佢對婚姻有番信心，先再去講呢個問題，我又唔急。」
早幾年，靚靚經常會為男友的緋聞大發雷霆，但今時今日，兩口子已甚少因此而吵架，她解釋說：「以前可能因為信心未夠啦！每次睇到報紙或雜誌寫佢同某女星有緋聞，我真係會好勞氣問佢有乜解釋，但佢就一定話我點解唔信佢，咁我就會同佢講，你對個個都咁有紳士風度，好容易會令人誤會，點解你唔調節一吓，盡量減少不必要嘅麻煩，我同佢講完之後，佢開始有改善，咁近年都少咗緋聞啦！至於上次泰國金魚缸沖涼事件，Chilam因為去之前已經同我講話想見識吓，所以我係冇反對，如果我係事後先知，一定會好嬲，但今次我係一早知，我相信佢冇越軌。」
靚靚和Chilam相戀已經有十三年時間，彼此已很了解對方，每次出現爭拗時，靚靚會先退離戰場，無論誰對誰錯，兩人一定不會將分手兩字掛在嘴邊，靚靚說：「兩個人可以走埋一齊十三年真係唔容易，所以我哋會好珍惜對方，𠵱家大家每日都會通電話，所以我同佢其實都好清楚對方行蹤。」
靚靚續說：「以前我因為性格急躁，成日話Chilam唔夠進取，但佢會解釋畀我聽，做人要安份守己同識得知足，佢叫我唔好成日搬自己嗰套擺入其他人身上，如果唔係會令同你相處嘅人好辛苦，所以我就慢慢去改變自己急進嘅性格，唔再過問佢工作情況，咁樣大家可以有多些空間，相處得更融洽。」
而最近靚靚與Chilam分別看了《達文西密碼》這部外國小說，兩人深深被小說內容吸引，靚靚說：「我哋兩個人睇書習慣好唔同，我睇書好快，好想快些知道結果，但佢就唔知點解永遠都好似有好多嘢要搞，所以睇一部書可能要花上一個月時間，不過我哋好鍾意睇完一部書之後，互相討論讀後感，好多時我哋嘅觀點都幾接近。」
談到生活細節，靚靚表示始終要互相遷就，她笑說：「好似揸車咁，我揸車時會好躁，所以我同佢一齊出街，佢會叫我做乘客，由佢揸車，但佢唔知點解永遠行錯路，以前我見佢行錯路會好躁，不過佢就永遠好氣定神閒，當冇事發生咁同我講：『行錯咪行過囉，總會到㗎！』久而久之我都服晒佢，唔會再話佢行錯路，呢啲就係兩個人相處嘅學問啦！」
撰文：陳月媚
攝影：林德雄
