一周兩件上期主打麗國（191），全周最多升38%，以上周五埋單價0.53元計，亦有24%進帳，一系兩味，再炒麗豐（1125）。
麗豐因呢兩年中國房地產熱，市場對麗豐滾瓜爛熟：往績PE7倍、每股資產值0.89元，資產折讓高達70%，呢期又食正上海地產熱……講質素，麗豐一啲唔輸蝕，但股價硬係窒住窒住，呢一點，同麗豐過去3年，每年老奉一次供股有關。但要咁睇，過去3年，大部份時間係麗豐發展期，除咗伸手供股，透過「一位主要股東」墊資亦唔少；而由02年度（7月止）至04年度，3次供股集資2.7億元，3年嚟償還主要股東貸款亦好落力，達1.7億元。最新04年度數據顯示，主要股東貸款只剩千餘萬元，又因麗豐今時今日財力（現金5億），及人士去留因素，照計，再無供股呢支歌仔唱。麗豐過去3年，慣性3月至5月宣布供股，今年有關方面肯收手，市場信心恢復，呢類股份，又係隨時一兩個開格局。
長城科技（074）上周五成交接近9球貨，係兩個月以嚟最大場面，又講兩點。第一，長城科技旗下長城電腦（60.47%權益），講明04年度（12月止）純利，預期增長達兩倍或以上，長城科技來自呢間附屬純利，估計達2.3億元，已經超出長城科技03年1.7億元水位，長城科技04年度純利，應該肥仔水。第二，呢個幾星期所見，有歐資手影，密密收貨，有大戶護航，照理冇咁快炒完。長科家陣每格跳1仙，但上兩蚊之後，就每格跳5仙，before兩蚊前，買定離手。
錢雋