肥仔豪實牙實齒推薦「碧紗籠」（二月二十三日夜馬第二場），認為冇Ｗ有Ｐ，碰啱左丁山是晚要參加春茗，唔去馬場，於是用電話投注落二場二號「碧紗籠」，ＷＰ兼投，諗住搵番餐消夜，點知隻馬落第而回，輸到熱門客眼坦坦。本想大罵肥仔豪一頓，不過諗起當日中午佢帶左丁山去飲靚咖啡及名茶，算喇，大家算打個和。
肥仔豪有窿路，知道幾位廣告界女士滿懷個人夢想，要走出太過routine嘅工作，喺中環街市對面，榮興藥房樓上一字樓，開咗一間所謂conceptstore，叫做onefineday。面積不大，內裏賣書、賣小裝飾品、精巧文具，附設咖啡或茶，於是帶左丁山上去睇吓。人在中環，行幾步路就到，正是室雅何須大，小樓內自有一陣書香。
呢四位女老闆嘅設想，以服務女性為主，賣嘅書與雜誌相當女性化及消閒性，啱女性口味。十分鐘就睇完晒，坐低飲杯咖啡先，女老闆親自炮製，原材料話係商業秘密，唔肯講。左丁山鍾意飲茶，話明要EarlGrey，女老闆用茶葉泡茶，唔用茶包，一飲之下，咦，好熟噃，似曾相識，最近飲晒啲Fortnum&Mason茶包，尚有記憶。
女老闆話：「算你識貨，我個人認為Fortnum&Mason嘅茶葉比Harrods嘅更好，可惜以前Oliver's有售，𠵱家冇晒，我只得向倫敦朋友求救，佢哋去F&M買茶葉寄返香港。」
料不到在如此小店，飲到來自三百年倫敦老店嘅靚茶，不過成本唔平，一杯茶嘅售價當然唔會便宜。女士之中嘅有閒階級，得閒上去onefineday睇吓書、飲吓茶，應該非常輕鬆。可惜左丁山生成勞碌命，成日滾水淥腳，呢間小店未必係mycupoftea。