煲碟王：
古巴革命英雄南美旅程改一生

上星期《功夫》DVD殺出，間間發行均選擇避戰，搞到今個禮拜冇乜好碟揀。好彩早兩日新返咗套《哲古華拉少年日記》3區DVD，雖然呢套長毛偶像嘅傳記片冇乜娛樂性，不過人哋話晒都叫攞過「西班牙SanSebastian國際電影節觀眾大獎」，睇吓人哋點樣踩住架電單車行成萬幾公里，不斷引發革命之路，話唔定港人對梁國雄議員有更深認識都未定。

記者：許福合

呢套《哲古華拉少年日記》係一部關於古巴革命英雄哲古華拉嘅電影，故事講到1952年，哲古華拉仍係一名二十三歲的醫學院學生，其生物化學家朋友AlbertoGranado，準備於三十歲生日那天，完成騎電單車環繞南美洲嘅壯舉旅行，重邀請埋哲古華拉加入，途經智利、秘魯、哥倫比亞、委內瑞拉等地，路程足足超過一萬三千公里！不過真正行程並非吃喝玩樂咁簡單，因為途經各地時，見到當地貧苦大眾遭強權剝削、人性鬥爭、欺壓民眾等不平事，慢慢二人心中生起革命嘅想法。一個旅程，足以改變一個人一生，此片能讓觀眾深入認識哲古華拉其人，甚至思想，同一般人見到在平價T-Shirt上哲古華拉大頭印象大為不同。

並未神聖化

哲古華拉作為古巴人民之革命英雄，當然曾有人將他事迹拍成電影，由和路達沙利斯執導嘅《哲古華拉少年日記》，着眼點放於令哲古華拉改變一生嘅整個旅程，而並非大部份觀眾所希望見到嘅革命部份，亦無將哲古華拉神聖化。而飾演哲古華拉嘅艾爾加西亞般奴，亦如實將角色那種樂觀但又摻雜着無奈、帶點浪漫嘅性格顯示出來，加埋憑其俊朗外形應可迷倒唔少觀眾。另一大配角洛哲高迪拿沙拿，於劇中亦有上佳演出，充份完成綠葉嘅工作。

欣賞南美風光

由曾執導《中央車站》嘅和路達沙利斯作導演，將一個故事平平無奇、缺乏緊張刺激、包裝人情味極重嘅電影，筆者尤其喜愛電影最後由黑白圖像構成嘅多張剪影，一幕幕影片裏出現南美洲人民依序於銀幕前淡入淡出，或許看完都未必記得，但他們確實曾經於電影內出現，只不過他們的真，反而令觀眾易於淡忘。另一個看此片值得留意之處，係可以見到拉丁美洲波瀾壯闊嘅自然景色，高山大河，各地風土民情，甚至會出現唔少著名旅遊勝地，就好似睇緊濃縮版《環宇風情》一樣，所以導演亦經常運用大WideShot拍攝，令南美洲風景更具氣勢。

更深入了解革命英雄

睇完電影，不妨睇埋Bonus部份，雖然冇特技解構、蝦碌鏡頭甚至MV撐場，不過當中包含咗導演同演員嘅訪問，睇完之後對人物及事件更為了解，如想知道多啲他們對哲古華拉睇法，就要留意。