葉璇和任葆琳前晚在保良局周年餐舞會的DorianHo時裝騷上，分別真空和大露背上陣，火併性感的Rosemary。出席的賭王四姨太梁安琪盛傳今年榮升保良局總理，前晚餐舞會上賭王何鴻燊包下全場枱價為四姨太造勢，大力支持她做總理。
保良局前晚在君悅舉行周年慈善餐舞會，賭王何鴻燊和四姨太梁安琪、財政司司長唐英年、陳小寶陳細潔姊妹、蔡綺蓮等均有出席，同場舉行本地設計師DorianHo（何國鉦）時裝騷，由名模Rosemary和陳嘉容等演繹，任葆琳（Pauline)穿大露背裙打頭陣出場，葉璇則真空穿上晚裝襯百萬元鑽飾壓軸演出。
葉璇前晚共演繹了兩襲晚裝，壓軸那襲她自言是真空上陣，並表示做足安全措施，她說：「我做埋防走光，真空嗰條重喺屋企試過先，其實最緊要係靚得嚟高貴。我喺劇集《西廂奇緣》扮相閣千金，我今晚會將呢份傾國傾城嘅古典氣質，全部騷晒出嚟。」
任葆琳則透露喉嚨生繭，稍後到醫院做聲帶手術，她說：「拖咗好耐喇，個手術係改善我聲線，令把聲柔和啲、清啲，我一向唔夠氣。」問她可擔心手術效果？她說：「唔怕，冇乜危險啦，不過有一輪冇得講嘢。我今次當瘦身行動，因為我自細病同發燒就會狂瘦。」
此外，賭王四姨太梁安琪盛傳今年會加入成為保良局總理，前晚她與孫明揚太太結伴赴會，何鴻燊由文化中心趕至撐場，更包下全場枱價做善事，為梁安琪入局壯聲勢，何鴻燊對此坦言：「我梗係支持太太做總理啦，做善事最好。」梁安琪則故作神秘說：「諗吓啦，兼顧到都會做，遲啲先講啦。」
採訪：JessicaNgan
攝影：ChenWaiOn
