近年來港星紛紛表態要開拓內地市場，但幾年前靚靚已看準這個龐大市場，密密在內地拍劇，以她的身價拍一齣劇可賺兩、三百萬，一年拍兩三齣，收入已十分豐厚，加上她較其他港星早開拓內地市場，在內地早已紮好根基，而年中除拍劇收入外，每年的內地廣告收益也極可觀，難怪她考慮移居上海，靚靚笑說：「我真係想去上海定居，但Chilam話自己朋友全部喺香港，佢唔想離開香港生活，佢唔同意，當然搬唔成啦！」
雖然靚靚在內地吃得開，但她表示：「其實𠵱家內地市場已經冇早幾年咁好景，再過幾年，我都唔敢想像係乜光景，𠵱家就話內地重需要香港台前幕後精英拍劇，但佢哋進步得好快，呢幾年已經培養出唔少人才，𠵱家內地所製作嘅劇集同電影質素一啲都唔輸蝕畀香港，如果香港班製作人唔加倍努力，將來要到內地搵飯食就唔容易。」
近年靚靚雖絕迹香港市場，但她其實正靜待時機，她說：「香港個影市咁差，唔係話你想拍好戲就有得拍，我當然想繼續喺香港拍番部好戲啦，不過都要有好劇本，其實我都好知足啦！我出道冇幾耐就攞新人獎，後尾重做埋影后，我嘅事業都算輝煌過，做藝人冇可能永遠企高位，總要明白呢個道理，咁做人先會開心！」