新車速報：<br>05年版加裝備抵上加抵GoodMorning

新車速報：
05年版加裝備抵上加抵GoodMorning

6萬幾蚊一架1086cc全新車？上年KiaMorning推出時早已成為事實！憑住一副可愛樣貌及驚人車價，一度出現供不應求情況，成為新牌仔恩物！05年版Morning已經到港，外形、價錢一樣不變地吸引，而且加上幾樣超實用裝備，用落一定覺得抵上加抵。

記者：馬慶武
攝影：陳偉強
模特兒：敏（D8）

後座加料安全實用

六萬幾蚊嘅新車價，的確係好吸引，起亞Morning更有一個平易近人、討人歡心嘅賣相。難得係廠方唔會見好就夠，為05年版Morning加上新裝備。當中最實用嘅係將後排座椅椅背以6:4分割，令到本來已經可以放平增加嘅載物空間更加實用更加靈活，就算有乘客坐喺後座，一樣可以放平隔鄰嘅椅背，擺放較長較大嘅物件。
照顧車主需要，亦加強後排座椅嘅安全性，為後座乘客提供獨立頭枕，當遇到從後而嚟嘅撞擊，可以有效保護乘客嘅頸部。雖然放平座椅時要拆除頭枕較為麻煩，但安全始終係最重要。

不變外形
■由極多小扇葉組成嘅鬼面罩夠搶眼，已經成為起亞Morning嘅招牌設計。

■車頭泵把同短小嘅車身好配合，不過EX版就冇加裝霧燈。

■直列式梯形尾燈設計唔算突出，令車尾睇嚟較平實。

■側鏡同車身同顏色，整體感覺更佳。

■尾窗頂有高置煞車燈，而且有尾窗水撥。

車廂設計華實兼備

外形冇變，依然保留可愛嘅車頭造型，尤其由一塊塊小扇葉組成嘅獨特鬼面罩，更加成為招牌設計。雖然今次測試嘅EX版本冇加裝霧燈，但新加設嘅頭燈燈影控制卻可以令霧中、黑夜行車更加安全。車廂布局華實兼備，座椅顏色選沉實襟用嘅黑、灰，亦可以選較搶較張揚嘅黑撞藍或黑撞橙組合，配合觸手可及嘅雜物匣及前後座杯座，超額達成細車仔舒適實用嘅基本要求。

2005新裝備
控制燈影
■05年版新加設頭燈燈影控制鍵，可隨個人喜好或道路環境自行調校。

後座頭枕
■後座加裝三個獨立頭枕，不幸發生意外，可以提供一定保護作用。

6:4割椅背
■後座椅以6:4分割，放平一邊椅背載嘢，另一邊都重可以載人。不過放平椅背要先拆頭枕，就有少少唔夠便利。

■一台1086cc直4引擎輸出唔算話好澎湃，不過用嚟代步已經好夠用，重好慳油㖭。

性能夠用超級慳油

其實韓國車喺本地車迷心目中已建立可信形象，性能表現都值得信賴。呢架1086cc嘅Morning，最大馬力輸出70匹，扭力9.9kgm，喺鬧市穿梭一定夠用，上高速「奉公守法」亦可應付，只係面對較斜嘅斜路就可能會比較勉強。試車當日載住兩男一女，喺斜路遇到燈位停車再開車，速度明顯爬升得較慢。不過以日常代步嚟講，Morning極佳嘅慳油表現就可以𠱁番車主開心，照規格睇自動波版平均耗油係5.8L/100km，相信手波版應可做到更佳成績。

實用車廂
■中控台對落設有兩個杯座，左邊放有揭蓋式煙灰缸。

■駕駛席右手邊有雜物匣，放手機、碎銀都咁方便。

■左圈轉數右圈速度簡單易睇，刻度滲出綠光亦好醒神。

■完全放平後座椅背，載物量激增。

■車仔細細，睇唔出後座空間都幾闊落。

■座椅都可以揀不同顏色配搭，當中黑撞橙或黑撞藍嘅配搭就啱晒愛搶眼嘅年輕車迷。

■中控台上嘅操控鍵排列整齊，不過最低一行按鈕好似設得較低，唔係咁就手。

■手波版配備5前速波箱，拖波或加速都更加直接，尤其係上斜，更加操控自如。

KiaMorningEXSpecifications

引擎：1086cc直4SOHC
馬力：65ps/5500rpm
扭力：9.9kgm/2800rpm
傳動：5前速手波，前輪驅動
懸掛：（前）麥花臣支柱（後）雙扭力連桿
制動：（前）透氣碟（後）鼓式
輪胎：155/60R13
尺碼：3495×1595×1480mm
軸距：2370mm；車重：872kg
車輛提供：起亞汽車（27609933）

新車售價：
$62,802（手波版）
$69,930（自動波版）

其他精選車仔

萬事得Mazda21.3

賣相吸引趣致，穩紮可靠，車廂設備亦非常齊全，1,300cc容積較大，亦夠慳油。
車價：$104,900

豐田Echo1.3

熱門車款，改裝配件多花款，手波版標準配備包括有真皮座椅、合金胎軨。
$106,110（手波）
$118,665（自動波）