第三屆特首選戰硝煙四起，自由黨主席田少日前話，煲呔日日喺官邸搞春茗，招呼各界人士夜夜笙歌乘機拉票，煲呔噚日開口反擊，話自己做財爺時已經要喺官邸搞春茗，招呼社會賢達，佢話往年搞足五場，今年只搞咗三場啫。
煲呔日前呼籲市民最少生三個，俾人視為怪論，科大經濟發展研究中心主任雷鼎鳴噚日喺個論壇上，直指煲呔講法冇道理，因為結婚生仔要考慮社會同經濟情況，政府制訂政策鼓勵人結婚生仔係浪費公帑，家計會會長何柏松教授亦唔撐煲呔，噚日喺《香港家書》中話生育不應單在考慮「量」，重要有「質」，煲呔收到未？
學者潑冷水，但有後生仔就聽煲呔支笛，廠商會蔡章閣中學五個中六理科生，憑一系列鼓勵年輕一代支持生育嘅建議，勇奪「香港公共政策創意獎勵計劃」中學組優異獎，佢哋建議傳媒日播夜播由《媽媽好》改編嘅生育主題曲，歌詞最好有「世上只有生兒好，有兒的父母好幸福」，同時整個名為「模擬父母」嘅電子遊戲，畀後生仔於虛擬世界中試吓「湊仔」樂趣，組員李欣兒話，聽完曾司長講人口老化帶來嘅社會問題，決定坐言起行，二十零歲就要結婚生子。
連意向未明嘅教統局局長李國章都跟風講吓生仔經，噚日出席活動時，問一個新婚女記者幾時「造人」，又問人「會唔會跟阿曾司長，司長話要三個」，搞到個新娘子面都紅晒。
傳真︰2623-9278
電郵︰