有線娛樂台今晚播嘅《星期六夜闖毛陳谷》，三位主持毛舜筠、陳淑蘭及谷祖琳訪問林家楝，林家棟就大呻對無綫嘅管理層失望，佢話：「我唔係對『無綫』呢個標記失望，只係對管理層失望。六叔（邵逸夫）開咁大間電視台，當然要由管理層去打理，當年我可以拍《娛樂插班生》，都係因為高層見到我做舞台劇，而唔係見到我喺劇集中嘅表現。之前我連做路人甲乙丙嘅機會都冇，之後就將我定型為小人物角色，嗰陣我諗『其實我着西裝都好型』!」
林家棟開始喺無綫紅，已有人勸佢走，佢覺得自己只係同「搞笑」扯上關係，希望公司可以畀多啲機會自己發揮，所以決定留低。直至○○年拍攝《酒是故鄉醇》出咗事，先改變主意，林家棟話：「嗰場戲要我入一個大酒窿，但公司連八百蚊嘅替身錢都慳，結果我受咗傷，其實我受傷對大隊都唔係一件好事，亦係呢件事令我決定離開無綫。」
𠵱家林家棟係劉德華嘅經理人公司旗下藝人，每個月有底薪保障，佢話當全世界人都覺得「林家棟」只係屬於電視，惟獨華仔不斷幫佢爭取。今年家棟希望可以為華仔嘅公司賺大錢，亦希望可以在電影頒獎禮上得到獎項。
有調查指出，現時香港有二十七萬人，擁有一百萬流動資金，容祖兒噚日往新城接受訪問時，被問到可是百萬富翁？佢就話：「咁我一定係啦，我一直將賺番嚟啲錢全部儲起，都有幾個一百萬啦。」問佢為何不作投資？祖兒話自己怕蝕錢，至於何時退休？佢就話賺到一億嗰陣先考慮退休。
劉德華日前接拍寰亞嘅新片《童夢》，今次新片重邀請得馮小剛導演助陣，馮導演為咗好友可謂義不容辭，繼《功夫》後再度客串，喺《童》片入面扮演幫助劉德華「長大」嘅科學怪人。同時李冰冰同莫文蔚亦將會喺戲入面分別扮演華仔嘅生母同後母。
第七十七屆奧斯卡電影頒獎典禮將喺後日舉行，華裔女星白靈前日喺荷李活出席由環保組織GlobalGreen主辦嘅賽前慈善晚宴，早排白靈喺柏林影展露乳引嚟德國文化界好大迴響，有人重封佢做「中國珍納積遜」，批評佢令影展降格，所以佢今次以透視裝上陣，唔敢再露點。
前日有報道話無綫同慈善機構搞節目收取全數費用，重轟無綫此舉不負社會責任，噚日無綫方面覺得該報導對公司上下好唔公平，於是由外事部曾醒明出面澄清，佢話好多時啲慈善節目都要無綫津貼出嚟，數目到𠵱家都未平衡到，無綫之前都製作咗個南亞賑災節目《四海同心送關懷》，製作費已經超過數百萬，所以曾醒明話咁嘅講法，唔係幾公平。
台灣名模林志玲過年期間去咗拉斯維加斯登台，事後有傳佢被騙陪食飯，當場拒絕兼嬲到喊，對方就搵咗黑道分子介入威迫，好彩有同行嘅邱王黎寬同中國星老闆娘陳嵐居中斡旋，先搞掂件事。噚日又有傳台灣法務部有關人士主動訪查呢件事，林志玲經理人江怡蓉回應：「我們不再回應這件事。」
一直有消息指F4計劃十二月喺香港開演唱會，不過就有傳李克勤同佢哋爭呢個檔期。朱孝天噚日接受訪問時話有聽過開演唱會呢件事，不過正式日期就未知幾時。另外，朱孝天話今日係第一次以個人身份到香港舉行簽名會，亦都係佢第一次咁近距離同香港歌迷接觸，所以心情都好緊張。
