自從政府大幅削減資源、又減公務員人工，但另一方面又要求公務員增值之後，公務員同政府嘅關係就好似香港早前嘅樓價咁冇好過。
噚日代表五個紀律部隊嘅紀律部隊評議會舉行第十五屆成立酒會，紀評會主席林國豪喺致辭時，當住主禮嘉賓公務員事務局局長王永平面前發炮，話政府呢幾年淨係識一味緊縮資源同減公務員人工，又要資源增值，令到公務員面對好大嘅工作壓力，影響工作效率，林國豪話：「唔相信資源增值同減低開支會影響效率，呢啲咁空洞嘅理想，相信只有喺書本度先可以搵到！」
但平叔亦都唔示弱，到佢致辭時立刻回敬：「今年係雞年，我希望紀律部隊人員可以好似雞年咁有氣派，即係好似雄雞報曉咁，咁有專業，又好似母雞生蛋咁，咁有效率。」平叔講完呢番說話之後，象徵式同班紀評會代表切蛋糕合照，然後即刻雞咁腳走人。
嘩，特區班問責高官呢輪搞乜鬼？莫非都惹咗禽流感，語無倫次？肥平大年初七話香港政府係隻肥鵝，生啲金蛋少啲細啲就俾人鬧；而瘦平就叫啲公僕做雞猛咁生蛋，真係聽到人啼笑皆非。
睇嚟紀評會真係要認真諗吓，係咪要舉辦多啲農場一日旅行團，等大家學習吓公雞點叫、母雞點生蛋，以便有樣學樣。
（圖）紀評會主席林國豪（右二）膶政府淨係識削減資源，王永平（左三）回敬叫班紀律部隊人員學公雞叫、學母雞生蛋。
傳真︰2623-9278
電郵︰