港大民意網站最新調查結果令唔少立法會議員行唔安坐唔樂，事關不論左、中、右派民望統統插水，八方噚日指工聯會一姐陳婉嫻不入十大議員榜，民望跌幅咪重勁過大班、長毛？有讀者指八方推斷純屬靠估，八方睇番港大民意網站資料，發現確實冇披露嫻姐最新民望數字，所以佢民望跌咗幾多分，暫時冇人知住，不過嫻姐知名度比上榜十人低，就係事實，榜上只有職工盟李卓人一個工會領袖，工聯會冇份，呢點相信搞工運嘅人應該思考吓點解，係咪呢輪太低調。
雖則有人為嫻姐申冤，但嫻姐就同八方講，從政多年早已對評分睇到化，只會以平常心看待民望升跌。佢話，換個角度睇，市民畀低分係反映關注議員工作，亦證明立法會議員做嘢透明度高，有乜行差踏錯都逃唔過市民對眼，今次議員民望跌咗，佢形容「咪當俾人打幾吓屁股囉！」
傳真︰2623-9278
電郵︰