寵物花園：<br>兔界賽跑show論盡個個唔爭No.1寵物花園：
兔界賽跑show論盡個個唔爭No.1
龜兔賽跑令我一直深信，兔仔是賽跑高手。不過欣賞過今年PetsCafe在鶴藪水塘搞的「小動物運動會」，我才知道，原來兔仔雖然走得快、又聰明，但係唔識行直線嘅！兼且隻隻論盡，一場比賽，用咗起碼十五分鐘才完成十公尺的賽程！
記者：邵超
攝影：楊錦文
鳴謝：PetsCafe（www.pets-cafe.com）、宏光到會盆菜（61365520）
賽道鋪草擾心智
不得不讚大會的精心策劃，雖然今次是雄兔、雌兔加閹兔混合賽，只分輕量級和重量級兩組，但大會就準備了活動鐵欄把雄兔及雌兔、閹兔分成兩個選手區，將意外懷孕的危險性減至最低。
五條跑道是用竹竿同魚網在現場就地砌成，石塊與石塊之間暗藏擾亂兔選手心智的美食——青草，以提高比賽的刺激氣氛。最正的是，初賽後在燒烤場還可以食到會正宗盆菜（附電爐），真係恨死隔籬的燒烤人士。
狗扮兔嚟喇！
■估唔到咁傳統的賽兔，都有隻唔識Do的狗仔走嚟搞事，大玩Cosplay！阿包，講真你個扮相又真係幾嬌俏嘅！
曬吓太陽先！
■肥姐成個大小姐咁「印印腳」曬太陽好疏乎，殊不知幾分鐘後會臨時俾人踢入會做選手，無得歎嘞！
賽事直擊
1.賽前熱身
呢個唔係黑市兔場，而係臨時搭建的雌兔加閹兔選手區，個個燕瘦環肥㗎！
2.主人緊張
兔選手準備出閘，主人心情都好緊張，話晒牠們從未受過訓練。
3.有紋有路
輕量級比賽試跑，大家起步入直路，都表現得唔錯。
4.忽然U-Turn
呢隻兔仔突然唔生性，走到三公尺竟然走返轉頭，要勞煩阿媽入場帶牠走回正途。
5.食飽才贏
重量級選手賓尼肥仔對美食不為所動，原來牠賽前狂吃，難怪差一公尺衝刺都唔多願郁，不過最後都贏咗冠軍。
蝦碌鏡頭
爛瞓
舞獅有一動作叫「睡獅」，重量級選手長毛賓尼笨笨有樣學樣，中途竟然瞓着咗！
偷食
家草不及野草香，輕量級選手獅子兔豆豆比賽途中竟然偷食，重食得好滋味，但憑後勁勝出初賽。
開片
輕量級選手家兔小白走咗去二線選手荷蘭侏儒兔芝麻嗰度，企圖搶去做誘餌的蘿蔔，兩個甚至大打出手。
喊驚
比賽現場氣氛太多人聲，雖然輕量級選手侏儒兔小小兔的阿爸已經用腳踏聲企圖嚇佢走，但終點似乎令佢更驚慌。
賽後報告
兔氣揚眉
輕、重量級三甲得獎兔光宗耀祖，同阿爸、阿媽來個大合照，是為新年最大禮物。
運動新星
獎牌斤両十足，戴咗一陣就好攰！唉，重慘過跑多轉。
舉兔若輕
唔好睇小呢張相，除咗兔選手多之外，舉起重磅的兔選手的阿爸、阿媽真係唔話得！
世紀之戰：新龜兔賽跑
經典寓言故事《龜兔賽跑》，兔子因自大和懶惰而慘敗，兔子祖先為此訓勉後人要將呢個教訓銘記於心，並將龜兔賽跑列為一年一度的兔盃邀請賽的其中一項環節。可能係性格決定命運，兔子未嘗一勝，今年派出輕量級季軍豆豆，決定一雪N年前恥，打破家族宿命，約同龜仙人再進行比賽。咁，到底邊個係冠軍呢？
豆豆：你使唔使用個背脊「得」住我咁寸呀？
龜仙人：睬你都儍，行得快好世界。
豆豆：唔使旨意掂我啲點心！
龜仙人：你頭先比賽已經食咗好多囉喎！
豆豆：等我舔乾淨啲毛先！
龜仙人：教而不善！
龜仙人：重差幾步路就衝刺，唔知個死仔有冇跟住嚟呢！
豆豆：嗚嗚……我愧對列祖列宗，你由得我難過吓啦！
龜仙人：唉，我都唔想贏㗎，係你掛住食同舔毛咋！