何安達千揀萬揀，過咗不惑之年卒之找到了夢裏情人，宣布拉埋天窗，三月十三日就正式結婚，大宴親朋。呢排都算係結婚旺季，二月二十六日酒店葉嫁女、三月十二日證券許嫁女，三個婚宴都係在金鐘五星酒店擺酒。
打電話恭喜Andy之餘，祝佢以後做一個良好公民，連生貴子，起碼生夠三個，最好湊夠一台麻將。Andy話：「做得幾多得幾多啦，曾司長嘅要求比較高啲。」
對博士Ｌ嚟講，曾司長啲要求唔算高，眨吓眼，佢已經誕下一女兩子，交足功課。左丁山笑佢：「博士，生多一名，可以得董特首頒授金紫荊。」博士Ｌ大笑：「我家姊妹平均有三個孩子，阿萍就生咗四個，公民責任盡到十足十，你哋班人就唔啱啦，生仔女一個起兩個止！」博士Ｌ一聲將軍，左丁山立即轉變話題，否則要搵林超榮屈穎妍兩公婆同博士Ｌ講。林超人三年抱三，生產力驚人，直情有資格做曾司長嘅人口政策顧問。以後曾司長應該對三孩或以上家庭頒授「榮譽市民獎狀」，為多產媽媽打氣。
退任立法會議員Ｃ有四個仔女。記得年幾前左丁山對Ｃ太講：「你為好多本港女士作出貢獻，拉高咗平均生育率數字。」Ｃ太話：「係咯，我有四位好友，一個冇結婚，一個生咗一名，一個生咗兩名，一個結婚而不肯生育，計起嚟，五個女士有七名仔女，平均每人一點四個，好似幾好，其實係我一個人拉高晒啲生育數字！」Ｃ太真肯犧牲自己，難得嘅係生完四名，佢仍然貌如三十歲美女。
滙豐梁兆基話香港人平均生零點九個，佢自己結婚不久，重未諗掂是否要打破平均數，今時今日，生仔生女之前要有充份經濟分析也。