期指結算日，好友領風騷，挾高大市主要靠「紅軍」，輔以地產股，大笨象滙控（005）受阻於近期高位133.50元，平收133元，繼續有成交冇升幅，但大部份C輪先行一步，似乎相當多人睇好下周一業績，買定C輪等派成績表。
滙控C輪：講穩中求勝，始終係4441，噚日收0.73元，升1.4%。隻輪6月尾到期，負溢價1.4%，槓桿率18.2倍（有效亦係18.2倍），引伸波幅低至2.1%。只要正股繼續向好，始終會還佢公道。
噚日紅色分子係主角，不但恒指上升靠中海油（883）、中移動（941）及聯通（762）撐起半邊天，國企指數更順利升破5000關，收報5024，升90點，可以搵中企C輪短炒。
中企C輪：炒中企C輪，數據最實際仍然係4545，國企指數噚日大升90點，4545勁升25%，收0.174元。隻輪4月尾到期，溢價1%，槓桿率8.8倍（有效6.9倍），引伸波幅34%。博國指高位破關繼續上，4545在保守中亦算進取，如果國指上到5200，4545有不俗回報。
和黃C輪：和黃（013）近排橫行為主，買佢啲窩輪冇乜着數，但如果睇好大市繼續升，和黃則一定有份，可以繼續留意和黃C輪3561，昨收0.41元，升3.8%，今年6月初到期，溢價2.3%，槓桿率17.2倍（有效10.4倍），引伸波幅21.4%。
章盛