雖然澳門賭業股近排頗靜，但經紀陳話唔好睇得太淡，尤其係龍頭股新濠國際（200）同信德（242）等仍在高位徘徊，不宜一口咬定熱潮已退。
至於成日話可能注入賭牌，但又遲遲未見落實的嘉華建材（027），噚日股價急跌7.6％，收7.90元，成交股數3264萬股，金額2.66億元。阿媽嘉華國際（173）表現就較佳，繼前日急升後，噚日最高見過3.30元，收2.975元，升2.58％，成交股數9528萬股，金額2.83億元。
經紀陳話，嘉華孖寶即將在3月3日公布全年業績，如無意外，阿媽表現會十分驕人。有大行幫嘉國計過數，話佢喺香港及大陸的地產項目相當值錢，佔每股資產值2元樓上，若計埋佢所揸住的嘉建，股價折讓相當大，現水平抵玩。
但小初就認為，絕大部份股民炒嘉華孖寶，主要都係炒大股東會注入賭牌，所以一句講晒，市場最想係賭牌注資事件早日落實。唔知稍後出業績時，管理層有冇好消息公布呢？
慕容小初