經紀陳日前提過友利控股（419）搞配股，貨源落晒友好機構投資者手上，結果一如所料，隻股噚日復牌企得相當硬淨，最高見過0.157元，收0.15元，升2.74％，成交股數9.36億股，金額1.2億元。
友利今次係以先舊後新方式，配售6.5485億股，每股作價0.12元，集資7858萬元。
經紀陳話，友利批完股，但故事未完，據講有關人等最近頻頻與證券界人士及芬佬會晤，大Sell其大陸傳媒概念。雖然未知人哋受唔受，但公司咁用心搞投資者關係，估計有後着，同時亦反映售後服務態度良好。
另外，噚日全市最令人注目的股票，必定係業績靚爆鏡的思捷環球（330），股價最高見56.50元，收55.25元，勁升17.55％。多間證券行都調高思捷目標價，但佢噚日差唔多一日升晒，則非常罕見。
經紀黃話，思捷除咗傳統基金外，據聞街外有唔少對沖基金，甚至場外衍生工具推波助瀾，所以場面先至咁熱鬧。
慕容小初