自從舊年放寬按揭成數之後，細價樓最受惠，成交急增，皆因買得細價樓，都係手頭資金唔係好夠嘅買家。之前中原同宏亞推出咗個百分之九十九點九按揭計劃，接到嘅查詢，都係想買呢類細價樓人士居多。
中原執行董事陳永傑話，自計劃推出以嚟，一共收到一百八十個查詢，當中八成諗住買三百萬以下嘅物業，包括天水圍嘉湖山莊同荔枝角美孚新邨，呢兩個細價單位選擇較多嘅屋苑，查詢反應最熱烈。
陳永傑重表示，七成半查詢客戶係未買過樓，以年輕人佔多數。首期唔夠嘅買家，雖然可以利用發展商嘅優惠付款辦法入市，但係新樓樓價愈嚟愈貴。
陳永傑話，想用百分之九十九點九按揭計劃嘅買家，主要都係想買百五萬以下嘅物業，所以喺整體查詢客戶中，有七成半想買二手樓，因而刺激多個細價二手屋苑成交上升。
地產建設商會副會長梁志堅日前透露，商會就新一份勾地表，已向政府表達意見，蘭西聽業內人士講，原來係政府舊年接觸商會，問佢哋對新一份勾地表有乜意見，商會於是喺年底時遞交意見書，主流意見係想增加透明度同縮短過程。
勾地表制度已經實施咗成年，其間業界都有啲意見；隨住樓市出現重大變化，勾地機制都有需要檢討且作出修改，令制度更完善。
不過，業界就擔心政府反應慢，有排都未改到，變成只係收取意見，咁就嘥心機。
樓市好景，大家都認同，但係好成點，就難以界定，不過，聽完呢宗成交之後，就可以清楚好多嘞。
美聯助理營業董事何勇方話，喺年三十晚，當唔少人去行花市之際，公司就有兩枱客，喺度鬥緊出價買荃灣朗逸峯十八座一千三百六十二呎A單位，呢兩個客同業主透過電話溝通，由黃昏六點幾，一直爭到凌晨四點，終於由一個商家，喺樓都未睇過嘅情況下，以約七百三十萬買到，未定自住或投資。
原業主本來開價係七百一十萬。
何勇方話，呢啲情況喺九七年旺市時都未見過。
皇家特許測量師學會一項全球商廈調查，結果顯示，喺超過六十個受訪城市中，北美同亞洲等發達城市，舊年下半年商廈投資交投較上半年暢旺，而新興經濟體系地區城市，因經濟興旺，租務需求錄得可觀增長，中國則扮演火車頭角色；而香港嘅需求嚟自租戶改善工作環境。
報告指出，發達地區嘅商廈投資需求強烈，以英國商廈物業最受投資者歡迎，增幅達八成。不過歐元區城市嘅表現就落後大市。
發展商想推動樓盤銷情，除咗加佣，就係畀代理獨家銷售。九龍建業嘅太子道西栢德豪廷，發展商即日起搞銷售比賽，喺下個月十三號前，促成最多成交嘅代理行，就可奪得樓盤獨家代理權一個月，重有八萬八千八百蚊獎金，有得獨家，又有獎金，都算吸引。
九建羅汝榮上個禮拜就話，個盤剩番三十幾個單位，呎價約六千五百蚊，隨住樓市復甦，換樓動力愈來愈強，所以餘下單位傾向以相連方式發售。九建今日同經絡集團合作提供樓按優惠。
美聯物業曾凱群講，噚日促成咗一宗成交，一名區內換樓客買入中層C室，七百六十五方呎，成交價五百一十四萬，呎價六千七百一十九蚊。曾凱群講，農曆新年過後，市民入市意欲回增，該盤睇樓量較新春前增加接近兩成。
電郵地址：
