秘書Ｖ行經中環上山行人電梯附近，見到有人排隊到一台八達通機「叮一叮」，有啲人重揸住成半寸厚嘅一大叠八達通卡嚟。佢返到公司，打電話畀一位同在中環做秘書嘅同學問：「咁咁咁，係乜事？」同學話：「你都算住得背，八達通卡叮一叮，就可以慳番兩蚊，搭地鐵特別抵！」
秘書Ｖ嘅辦公室就喺地鐵站對面，搭地鐵非常方便，佢暫時知道中環只有一處可以「叮一叮」，因與辦公室相差一段距離，想慳番兩蚊車錢，覺得幾費事喎。心諗如果可以叫信差出街之時去叮，就可以慳多啲錢嘞，但係叫信差做私人嘢，會俾上司鬧啫！
點知信差走嚟同佢講：「香港人最識得如何搵錢，地鐵推出乘車優惠，益咗我啲信差行家，有幾位已經秘撈，專門代同事去叮機，收費五毫。嗱，我同你去叮，你慳番兩蚊，畀五毫子我，仍然慳個半，有你着數啫。」秘書Ｖ話：「一日賺雞碎咁多，你都制？」信差話：「搵錢艱難，一個賺五毫，二十個賺十蚊，一星期五天可以賺五十，一個月多兩百，喂，求老闆加薪百分之二，都冇咁多錢呀！」
小數怕長計，密食當三番，地鐵優惠價竟然為信差及有心人提供商機。點解地鐵要低調地唔宣傳，推出優惠呢？據講地鐵做過一個調查，香港人唔願行太耐至去到地鐵站，大部份地鐵乘客都係去地鐵站方圓七百碼之內嘅。為咗吸引啲遠距離乘客（例如灣仔北行到去灣仔站），地鐵在灣仔北裝置一台八達通機，八達通卡在此一叮，再行去灣仔站搭地鐵，就可得到車費兩元折扣。咁就有生意做咯，有人專門代理「叮機」，收集八達通卡去叮，每叮賺五毫。據講地鐵行政總裁知道有呢回事之後，好嘆服香港人動腦筋賺錢之快！