何韻詩的新歌《你是八十年代》MV，布景金碧輝煌，襯托出八十年代羅文和劉培基帶給觀眾目不暇給的視覺享受。穿吊帶裙的阿詩拍攝時幻想自己是漂亮公主，卻因身上貼滿膠紙防走光，以致傷痕纍纍。
何韻詩日前在西貢拍攝新歌《你是八十年代》MV，這首歌是讚頌前輩羅文和劉培基於八十年代為觀眾帶來精采的視覺享受。
為了營造金碧輝煌的八十年代感覺，無論場景布置還是服裝，全是精心炮製，阿詩說：「導演真係好厲害，可以將一個片廠變成高貴優雅嘅地方，單單係天花上嘅鑽石波波，已經係大家用咗三日時間，用人手一塊一塊咁黐上去；而嗰張鑲咗金片嘅床，瞓上去嘅感覺真係好似公主咁，好感謝佢哋喺我嘅MV入面畀我實現夢想，將我變成漂亮嘅公主。」
阿詩在MV中更穿吊帶碎花裙上陣，由於拍攝當日天氣寒冷，出名怕冷的阿詩雖然暖包隨身，但仍無法抗禦寒流，令阿詩不禁自歎倒楣。
為了避免春光乍洩，阿詩在吊帶裙胸前黐滿膠紙，她笑說：「條裙好靚，但上上下下都好容易走光，所以我喺胸前好病態咁黐滿膠紙，好似膠紙人咁，但返屋企換衫後就發覺遍體鱗傷，呢次真係為藝術犧牲啦。」
