思捷（330）半年成績表靚靚，為個市帶來動力。恒指漲102點，思捷貢獻32點，僅次於滙控（005）嘅36點。跟住落嚟，個市點走，就要睇吓下禮拜一滙控同恒生（011）盤數係點。
思捷C輪：思捷收55.25元，大升18%，帶動C輪升破天花板。3760由41仙飛上85仙，升幅107%，隻輪8月初夠鐘，溢價5.9%，槓桿率6.5倍（有效4.5倍），引伸波幅40.6%；2104升幅65%。思捷C輪平日好少成交，發大財者有限。兩隻輪急升之後值博率大降，即使認為芬佬會繼續踢高正股，都只應該喺低位先至買入。
中銀C輪4578：滙控升1元，中銀（2388）升5仙。滙控張成績表如果獲得市場受落，中銀亦都會受到抬捧，等機會收集中銀C輪。
主角係4578，喺7月尾夠鐘，輪價9.3仙，溢價2.9%，槓桿率15.8倍（有效9.2倍），引伸波幅21.2%。另1隻長期C輪4644亦諗得吓，輪價15.9仙，因為好長命，明年2月到期，溢價要畀8.6%咁高，槓桿率9.3倍（有效5.1倍），引伸波幅28.6%。中銀有唔少今秋之前到期嘅C輪，槓桿率大大，溢價高高，千祈咪多手，淨係望住爆炸力而入貨，輸多過贏。
恒指C輪3775：恒指重上萬四，未必會直線咁升，有可能反反覆覆，低位博反彈，諗恒指C輪玩即市，好多隻好揀，好多隻交投大，買賣唔怕冇對手。3775唔錯，7月尾到期，輪價21.1仙，溢價2.1%，槓桿率14.8倍（有效9.5倍），引伸波幅18.9%。
章盛