南亞大海嘯兼溫室效應，特區政治亦受到磁場干擾，出現超級騎呢現象！民進黨（民建聯與港進聯媾合後簡稱）前黨員朱漢華，本來計劃補選北角堡壘區區議員，點知臨時遭到民進黨反面不認人，拒絕支持，氣急敗壞之下，朱漢華獨自洗樓，身心俱疲慘死！
人哋朱漢華又冇嫖妓，又冇去番禺尋歡，慘遭黨組織拋棄。若然民進黨講「和諧」，家和萬事興，又點會搞成咁？
民主黨亦唔好得去邊！何偉途退黨事件，婆婆媽媽、拉三扯四，黨中央終於接納何偉途「退黨」！不過體恤佢魔掌餘生，收入微薄，牛皮癬肝炎湯藥費，黨中央代繳，予以豁免！
咁嘅「政治新聞」，真係都幾令人不安！特區政治全線大反智，包括啲所謂立法會議員民意調查！前日公布嘅港大調查結果，有指鄭大班民望暴跌十五點，好似大班變咗成績最差嗰個！
實情係咪呢？港大調查結果，只不過係立法會受歡迎度排名前十大嘅議員！上三個月前調查，大班嘅民望支持積分百分之五十四，排名第七；今次百分之三十九，排名第九！
冇錯，係跌咗十五點！不過民進黨嘅陳婉嫻，上次民望指數六十二點，今次直頭跌出十大，排名第十一！
陳婉嫻跌咗幾多點呢？今次排名第十嘅長毛梁國雄，得分三十四點，陳婉嫻今次十名不入，即是得分一定低過長毛嘅三十四點，由六十二直插到低達三十四，「嫻姐」嘅民望，大幅暴跌至少二十八分，其實勁跌多過鄭大班成倍！
陳婉嫻勁跌至少二十八點，有啲人一字不提，大班插咁十五分就成為話題，你話公道唔公道？特區政治真係詭秘騎呢！
傳真︰2623-9278
電郵︰