葉蒨文（沙麗）噚日喺將軍澳電視廣播城接受節目《香港直播》訪問，提起曾蔭權話「最好生三個」嘅言論，沙麗就話：「唔知香港係咪真係『淫』婦少咗，不過我都唔同意『最好生三個』呢個諗法。」原來沙麗口快快，竟然將孕婦講咗做淫婦，搞到在場記者個個笑到肚痛。
不過，沙麗嘅閨中密友朱玲玲就真係符合曾司長講嘅多生言論，而且大公子霍啟剛同二公子霍啟山嘅緋聞更加係全城熱話，沙麗話：「佢（朱玲玲）都講過啲小朋友又唔係做錯事，談戀愛都好正常，只不過佢哋嘅戀情太高調。」
沙麗又話以前同朱玲玲出街都會同傳媒展開追逐戰，嗰時重係小朋友嘅兩位霍公子笑佢哋唔好避嚟避去，要企定定俾人影，沙麗𠵱家就乘機窒番兩位公子話：「你哋𠵱家咪企喺度俾人影囉！」
沙麗又話做媽咪嘅，日日打開報紙見到自己個仔嘅新聞，一定會心跳加速，佢話：「我𠵱家同朱玲玲出街，啲記者都會推我去一邊，淨係影佢，但我都樂意過啲平靜生活，如果𠵱家先生仔，咪又要日日俾人追訪！」
梁思浩噚日出席喺海運大廈舉行嘅《第十一屆十大電視廣告頒獎典禮》記者會，思浩早前喺雜誌度扮郭晶晶扮到入形入格，估唔到重俾纖體公司搵佢做代言人，佢話：「廣告商話如果我肯再扮郭晶晶就加多三十萬酬勞，不過我都要搵律師研究吓有冇乜嘢法律責任，最好問埋霍啟剛會唔會介意，晶晶始終係國寶嚟！
周渝民（仔仔）因演出《流星花園》而俾日本觀眾認識，重俾日本連鎖百貨公司Parco選為三月份舉行嘅「白色情人節活動」嘅代言人，今次係Parco第一次邀請外國嘅藝人擔任代言人工作，𠵱家喺日本接近二十個主要城市都可以見到佢嘅大型廣告板，如果仔仔喺日本走紅，都唔係奇事。
葉璇早排接受電台訪問，傾到入行以嚟同好多圈中人傳緋聞，好似陳浩民、谷德昭、熊倪等，葉璇好坦白咁回答其中一個緋聞係真嘅，佢話：「以前大家合作過，最初係朋友，後尾見得多感覺好好，但因為性格不合分手。」問葉璇同佢拍拖有冇壓力，葉璇話：「有㗎！我啲屋企人都覺得我唔係咁適合同呢個人繼續，我諗唔會復合，大家做朋友都幾好。」
任賢齊噚日為新唱片去商台宣傳，佢有台灣「師奶殺手」之稱，原來男人都好鍾意佢。佢之前去廣州登台，就有個男歌迷當眾求婚，重好肉麻咁叫佢做「豬豬」。小齊話：「我真心鍾意女仔！以前都有男仔鍾意過我，我之前鍾意浸溫泉，有啲江湖人物見到我都話我身形好，但𠵱家做咗公眾人物，就好少去喇。」
容祖兒（Joey）噚日到電台接受訪問，佢話下個月會到外地登台，其中一站係馬來西亞嘅雲頂。Joey話以前曾經到過雲頂做嘢，喺酒店房開咗窗後，啲雲竟然飄入嚟，好似入咗仙境咁。前日係元宵佳節，但Joey就要喺工作中度過，佢話：「我冇約人，只係返咗屋企睇鬼片，當係七月十四囉。」
呂方前晚接受港台訪問，講吓自己嘅心路歷程，自然提到追鄭裕玲嘅經過，佢話：「嗰陣時個心雄，鍾意邊個就追邊個，其實係緣份。有一次同佢一齊去美國登台，嗰陣大家不瞅不睬，當時係過新年，咁啱唔記得啲歌詞，佢就寸我話『你唔係唱歌㗎咩？」我就返去苦練，上到台唱嘅時候輪到佢唔記得，就係咁開始。」
