喺上年十一月十六號入伍嘅韓國男星宋承憲，唔經唔覺已經喺軍中度過咗一百日，佢噚日首次獲得五日四夜嘅假期，可以離開軍營四處玩，順便見吓一班好掛住佢嘅fans。
喺噚日清早天未光，已經有一班嚟自韓國、日本以及香港等地嘅一百多名fans，冒住嚴寒去到宋承憲所屬嘅江原道華川陸軍勝利部隊軍營外等待偶像出營。到咗早上七點左右，身穿軍服嘅宋承憲從軍方巴士落車，一班fans即時蜂擁而上，宋承憲向fans行禮致敬，話好感激佢哋遠道而嚟接佢，重好好笑容咁向fans拜年㖭。
宋承憲原定喺噚日下晝出席歌手好友曹誠模嘅MV試映會，但最後佢都冇現身。事務所就解釋話宋承憲仍然喺服役期間，唔希望太高調喎。另外，佢亦打算喺聽日去劇集《悲傷戀歌》嘅拍攝場地探班，同權相佑、金喜善等演員以及其他工作人員見見面，劇集嘅工作人員亦準備好一個小小嘅派對歡迎宋承憲，而宋承憲就會喺二十八號下晝返回軍營繼續服役。