雞年伊始，警察公共關係科（PPRB）總警司馬維騄噚日同傳媒茶敍，介紹佢新嚟嘅副手，由機場保安公司調返嚟嘅高級警司張德強。馬Sir致辭時，回顧佢上任以嚟嘅工作，佢話前年平安夜上任，即從記者口中得悉「賊王」季炳雄落網嘅消息，跟住一年就接連發生地鐵縱火、校園暴力、政府總部清場、天水圍倫常慘案、電台節目主持人封咪事件、選舉、泳池紅蟲等，單單都同警方有唔同程度嘅關係。
舊年PPRB接咗超過三十萬個嚟自傳媒記者嘅查詢，平均一日處理九百幾個，尤其係第三代通訊系統投入服務後，傳媒向PPRB嘅查詢更加有增無減。唔少行家又趁機再次表達新聞界對第三代通訊系統運作後，對採訪工作嘅影響，馬Sir話有改善空間。
而今年佢哋最大嘅挑戰，相信就係年底嘅世貿部長級會議，全世界都睇住警方到時點安排保安同處理示威者。
（圖）馬維騄（右）向傳媒介紹佢嘅新副手張德強。
傳真︰2623-9278
電郵︰