雖然大市噚日受美元、美股急跌回軟132點，但好多人仍然抱住炒股唔炒市的心態，所以有個別股份繼續受追捧。經紀陳噚日話發現新大陸，問小初有冇留意聯合集團（373）同聯合地產（056）兩母子升咗好多？
聯合系兩母子去年曾炒過一轉，但舊老闆認罪入獄之後，隻股當堂靜晒，但今年初又靜靜地起革命，日日升一兩格，股價不知不覺已接近52周新高。
聯集噚日又升0.91％，收11.05元，成交股數31萬大股，金額349萬元。至於阿仔聯地更升2.97％，收5.20元，成交股數71萬股，金額364萬元。
經紀陳話，聯合系股份向來受市場忽略，但股價比起資產淨值折讓好大，以阿仔聯地為例，持有的物業近兩年升值唔少，至於阿媽本身的財務借貸生意亦做到有聲有色，若計資產值的話，兩股就算升咗咁多，仍十分吸引。
小初心諗，如果計埋其他歷史因素，兩股玩唔玩得過，就認真見仁見智。
慕容小初