多得美股唔少，港股昨日散散哋，恒指埋單唔見132點。有1個好現象係，全日高低波幅只係57點，個市跌得嚟冇恐慌性感覺。2月期指跌夠198點，低水60點。
傳統智慧係低水屬於利淡，不過傳統智慧好多時係唔靈多過靈，對個市前景，唔使咁驚。昨日上升股份（不計認股證）仍達下跌股份嘅0.6倍，可以代表人心淡定，淡定下一句係有錢剩。
地產股C輪：昨日推介嘅長實C輪3560與新地C輪4643，喺長實（001）與新地（016）各跌1.25元與0.50元嘅環境下，自然跪低，分別散13%同9%。瑞銀林總講嘢，睇好樓市。信佢老哥嘅話，兩隻地產C輪更要趁低買。3560跌得多啲，值博率更大，隻輪6月中到期，輪價34.5仙，溢價3%，槓桿率21.2倍（有效11.6倍），引伸波幅20.5%。另1隻諗得吓嘅長實C輪3566，6月初到期，輪價59仙，溢價0.9%，槓桿率12.4倍（有效9倍），引伸波幅22.7%。
和黃C輪3561：上禮拜講過和黃C輪3561，密食當三番。隻輪昨日收38.5仙，跌9.4%，試緊月頭低位，又到短炒撈貨時候。隻輪6月中夠鐘，溢價3%，槓桿率18.1倍（有效10.3倍），引伸波幅22.6%。低位上車後，上見0.48元takeprofit。
中移動C輪3599：中移動（941）跌0.50元，收24.95元。熱門C輪3599收12.5仙，散16%。早前，中移動連續7日到25.50元即行人止步，無力再上。估計短期仍會有調整壓力，如果再跌多幾毫，買3599博反彈。
3599喺7月到期，溢價5.5%，槓桿率20倍（有效10倍），引伸波幅23.1%。溢價唔算低，買嚟炒啱過買嚟揸。
章盛