韓國男星張東健近日成為時裝品牌佐丹奴嘅最新韓國代言人，佢早前同埋一直都係該品牌代言人嘅女星全智賢及男星鄭宇盛合作拍攝咗一輯廣告，佢哋重會演繹一段充滿激情嘅三角關係。
張東健早前為咗拍攝新片《颱風》，特登走去減肥，一減就減咗八公斤，變得更加有型有款，近日重成為時裝品牌佐丹奴嘅韓國代言人，真係一「減」兩得，而佢就啱啱夥拍全智賢同鄭宇盛拍攝咗一輯春夏季新裝廣告。
講開廣告，全智賢喺上年夏天幫佐丹奴拍嘅廣告入面，身穿性感露臍小背心，同男模特兒大跳貼身火辣勁舞，差啲俾韓國電視台禁播，故相信今次嘅廣告亦同樣會令fans萬分期待。
據知新廣告嘅概念係「HappyTogether」，並將會喺今晚韓國舉行嘅試映會度首播，到時會有唔少時裝界人士同記者出席。而佐丹奴亦計劃將全長十一分鐘嘅廣告連製作花絮，收錄成VCD，送畀買衫嘅顧客，相信可以吸引到唔少張東健同全智賢嘅fans幫襯。