中國駐特區外交部特派員楊文昌話：公務員及商界，「可以」各一人競選特首，又指示：只要大多數港人接受，中方就可以接受！
楊某講嘢，都重幾開放，點知一到咗本地親中分子口中，即時自動加緊幾分！紡織商人陳永棋話：下屆特首，首先要「中央接受」，其後係港人接受，跟住係可以「團結」各方面利益！
何物陳永棋，胡說八道？楊文昌話：「只要大多數港人」接受在先，「中央」就可以接受，輪到某些人解釋，倒果為因，將港人意願，置於「中央」決定之下，港人治港，真係變成空話。
查實，楊文昌主管「外交」，特首選舉，唔通係外交事務，香港屬於「外國」，故此要由一名外交官來發言？
若然限定公務員一人、商界一人，根本就係干涉特區內政！不過楊某只係話「可以」，又冇話限死係兩個！換言之，最少係兩個，都冇話唔得！
外交專員既然專責外交事務，咁佢嘅言論，港人當然可以唔聽！公務員同商界各一人選特首？商人治港，治出個廢董亂政，港人重唔見過鬼怕黑？整多個商人做，特區衰十年唔夠，又想衰多十年？香港邊有「商人」？地產暴發商就有，二世祖就有，靠呢亭商人治港，點會唔死？
咁中產階級點解冇代表？五十萬人大遊行，中產階級齊怒吼，廢董去年施政報告話關注中產階級利益，話組織一個諮詢委員會，講吓講吓，又變咗吹水！中產階級要參政，就梗係要有自己嘅特首候「選」人，由專業人士出「選」，鼎足而三，至少可以分薄所謂「商人」嘅票！
試過商人禍港，搞到咁多人反對官商勾結，利益輸送，整多個商人上台，香港唔知重會變成點。專業人士或公務員做特首，受中產階級支持，社會先至穩定！香港嘢佢唔係咁熟，楊文昌都係評論吓台海問題好啲！
傳真︰2623-9278
電郵︰