賓架陳、律師Ｗ、公子Ｌ等新年結伴遊台北，行行企企，飲飲食食，對台北印象麻麻，甚至認為鼎泰豐小籠包，係名大於實，唔值得排隊近一個小時。講到尾，佢哋認為喺台北根本好難行街（除咗喺信義路新區），因為街道凹凸不平，摩托車到處擺，過馬路冇厘秩序，同東京、香港、三藩市差好遠。
講起行街之方便，香港實在一流，在世界數一數二，台北當然冇得比。但論乾淨，又難與東京爭鋒，人哋實在管得好，繁忙中表現秩序，起碼一定唔會亂拋垃圾先。
律師Ｗ話：「此可能與家教有關，傳統上日本女人結婚後就唔再打工，專心留響屋企打理家務，教養孩子，故此日本兒童好守規矩，我哋香港人就辛苦咯，一家需要兩份收入，太太好唔得閒，自然唔可以照顧孩子得咁多，尤有甚者，一啲媽咪本身嘅教養都有問題，竟然連《殘酷一叮》呢啲自虐節目都送子女上去玩，究竟為乜？貪錢乎？慕虛榮乎？呢類家長直情抵鬧。」
如果要孩子接受失敗，學習認輸經驗，最好叫佢哋參加體育比賽，組織球隊也好（足球、籃球、排球），個人比賽也好（乒乓、網球、羽毛球、柔道、跆拳道），孩子參加比賽，多數會輸，輸完又再參加過，玩足十年八年，孩子就會識得接受失敗、團隊精神及東山再起、最後勝利嘅經驗。英國寄宿學校搞學生欖球賽，就係培養體育精神、團隊精神、成功與失敗嘅經驗嘅。
左丁山小時候參加小型足球隊，周圍踢波，有輸有贏，一次挑戰鄧鏡波中學全場捱打，輸咗七比零，真係沒齒難忘，自此就親身體驗到一山還有一山高，唔敢沙塵。