周杰倫早幾日公開承認同台灣女主播侯佩岑拍拖，曾被傳介入周杰倫同蔡依林戀情嘅徐若瑄，噚日喺台灣出席護膚品宣傳活動，徐若瑄除咗否認自己係第三者之外，又自爆同吳建豪一齊食情人節大餐，佢重話兩人係可以十指緊扣嘅朋友。
對於「周侯戀」，徐若瑄用國語話：「身為朋友，我也算是外人，別人感情事外人就不方便多說，我只能祝福他們。」提到早年周杰倫被發現同徐若瑄同遊日本，徐若瑄就話：「我很好客，日本我熟，很多台灣藝人來我都會招待他們。」
徐若瑄又講起吳建豪，佢竟然話：「我們是可以五指緊扣的好朋友。」啱啱講完佢又改口：「講錯了，是十指緊扣啦，反正我們就是還不錯的好朋友。我有男友一定不會刻意隱瞞，不過還是要看公司贊不贊同我公布。」
此外，國民黨主席連戰個仔連勝文，曾同侯佩岑傳過緋聞，據知連勝文知道「周侯戀」後好唔開心。連勝文噚日透過老竇嘅辦公室發表聲明，話今後都唔會再回應呢件事，亦唔會授權邊個幫佢講嘢，連勝文重話會祝福佢哋。
第二十九屆國際電影節喺下個月二十九日開始，今屆主辦單位決定頒發一個特別獎畀劉德華，以表揚佢多年嚟對電影嘅貢獻，屆時佢會獲得一個名為焦點演員嘅榮譽，據知電影節會展出華仔其中十一部作品。華仔上年奪多項影帝殊榮，電影節發言人話係時候表揚一下紅足二十年嘅華仔喇。
葉蒨文噚日帶埋佢兩隻芝娃娃去商台做訪問，講講吓佢三月同香港管弦樂合作開嘅演唱會，點知沙莉突然轉話題，佢話：「嗰日銅鑼灣槍擊案，當時我喺對面間舖頭買緊衫，我都聽到槍聲，即刻想走，點知俾人攔住，之後迫住又要再揀衫。」
亞視噚日話喺廣播道總台宣布大計，第一時間話韓風係由亞視吹起，第一個引入韓劇嘅係亞視喎！之後重話用咗六位數字嚟買咗套《女人天下》，亞視高層葉家寶話：「呢套《女人天下》係無綫《金枝慾孽》原裝版，佢哋好多都係抄呢套劇。」
章子怡前日喺香港出席第十一屆香港電影評論學會大獎頒獎禮，佢獲得「最佳女演員獎」，章子怡領完獎就連趕幾場，佢最後喺銅鑼灣食完日本菜就坐車去機場，搭夜機返美國。問章子怡有冇乘機見吓霍啟山，佢一直笑住唔答，章子怡早前生日，佢話：「那天我在北京跟家人度過。」
洪爺、肥仔聰及醬爆前晚喺錦田拍杯麵廣告，由田雞做導演同監製，講到佢哋踢走Twins拍呢個廣告，肥仔聰話：「爭到Twins就話啫，爭贏方力申就話啫。」田雞話自己簽約一年有四位數字酬勞，但有過百萬製作費，本來廣告商想搵周星馳做導演，但檔期配合唔到。
