老董呢輪做咗人肉春茗消耗機，全部忙埋啲無謂應酬，日日跑足幾場酒會，唔怪得每度停一停就鬆人。特首辦話，佢下個月五號會出席北京舉行嘅人大開幕禮，有冇得單獨見胡溫再受訓斥，尚未知喎。
胡主席勒令老董查找不足，多家傳媒機構就幫佢舉辦咗個《2004年特區施政十件大事評選》，噚日進行頒獎，請咗老董出席，其中新法書院、地利亞修女紀念中學同銘基書院奪得最踴躍參與獎。
呢十件大事睇怕老董都頂心頂肺，其中領匯上巿風波以六萬幾票成為大事之首，其餘上榜事件依次係賤賣紅灣半島、沙士調查報告發表，楊永強及梁智鴻辭職等等，全部係老董嘅最updated敗績。
特區政府七年禍港，退休高官個個都俾人昅住，加盟咗新創建嘅前一哥曾蔭培，噚日有記者同佢講起鍾麗幗退休單嘢，佢猛話「唔關我事」，自己係依足程序去做。一哥重話，轉入商界後都工作愉快，身體重好fit，放假就去行吓山㖭。
（圖）老董猛咁同班學生握手，唔知係咪想多謝佢哋幫自己查找不足？
傳真︰2623-9278
電郵︰