個個見到袁天凡去投地嘅記者，都以為佢係代表盈科大衍地產。其實，大家都錯晒，袁天凡噚日就同一班行家講，今次係代表盈科保險去投地，希望可以起番幢寫字樓，最少一半留畀盈保自己用。
今次盈保搵咗個拍檔一齊舉牌，佢無話係邊個，只話盈保佔六成，拍檔就佔四成，個價叫到十億二千萬嘅時候，就無再舉牌。鬼咩，諗住自用就唔使咁貴買啦。
唔怪之得佢噚日入去賣地場之前，口口聲聲話自己唔係地產商啦，原來真係冇耍記者。佢重話今次志在學嘢，唔知佢最後學到咩呢？會唔會係超高價買地對公司股價無益？
不少公司喺搵錢之餘，都開始做啲社會公益服務，為咗表揚呢啲公司，香港社會服務聯會，每年都向獲提名又合準則嘅公司，頒發「商界展關懷」標誌，原來唔少公司都同地產有關。
中原地產同中原地圖就齊齊攞獎，中原地產係第三年，而中原地圖係第二年獲發標誌。美聯同香港置業都攞到「商界展關懷」標誌。
另外，信和集團同旗下物業管理及酒店都一齊得呢個標誌，信和集團連續第二年，信和物業就連續第三年攞到呢項殊榮。
至於物業管理公司置邦，都一樣連續三年獲發呢個標誌。
原來好多同物業有關嘅公司，都連續幾年獲得「商界展關懷」標誌。
賣地又創佳績，唔少地產界人士話樓市已確認復甦，全面起動。港置行政總裁胡日發話，未賣地之前，即包括農曆新年假期嘅七至十三號，二十八個二手指標屋苑得二百六十四宗成交，到上個禮拜，唔少買家估計賣地會造好，偷步入市，成交推高至四百零五宗，如果業主唔大幅反價嘅話，今個禮拜應該可以到達五百宗。
樓市走勢勁，部份買家不惜追價入市。大角嘴帝柏海灣一座中層F室，一千三百三十六呎，買家追價二十五萬到七百二十五萬先買得到個單位。
裕泰興上環翠麗軒，正式開售只不過四日，已經賣咗超過九成，噚日搞慶功。獨家代理嘅中原，特別整咗個「90%」嘅冰雕，由裕泰興羅守耀同中原黃偉雄，負責用槌仔打爛個冰雕，寓意銷情突破九成。
羅守耀話，因為買家積極追價，個盤先至賣得咁快，五十幾個單位嘅平均呎價達六千五百蚊，最貴嘅頂樓單位八千五百幾蚊。剩番一成單位，諗住保留收租，或者待善價而沽。
翠麗軒有六、七成買家係外籍人士，其中一位買嚟投資嘅外籍機師JohnAshford都有出席慶功，佢話價錢雖然貴咗啲，但係都合理，所以買咗個單位收租。
喺本港代理渡江開設分行之後，澳門樓市透明度漸高，中原地產（澳門）話，舖位市場由舊年中開始，成為當地人嘅投資新寵，好似板樟堂、大三巴、新馬路、高士德同官也街，重成為最新嘅五大商舖區。呢五個區共有近一千個舖位，出租率九成以上。
以板樟堂區為例，一個地下及閣樓各三百呎舖位，附露台，由雪糕店租用，呎租三百；同區一個三千五百呎地舖，由時裝連鎖店租用，呎租百七蚊。
另外，中原（澳門）指出，氹仔泉福新邨二期，發展商將三萬五千餘呎商場，分間為三十四個舖位招租，每方呎二十五至三十蚊，計劃租予日本及意大利特色飲食店。
電郵地址：
