噚日中總舉行春節酒會，八方見到亞視行政總裁陳永棋同政界女強人蔣麗芸鬼咁好傾，就捉佢哋拍張合照，點知蔣小姐講笑問八方，使唔使蹺住棋哥隻手影，等人哋以為佢兩個有緋聞，八方望吓棋哥，佢死頂話唔怕，因為佢太太一定唔信，結果梗係冇蹺手啦。
亞視同Now合作搞二十四小時新聞台，聽講話反應都唔錯，八方一直覺得無綫六叔唔知搞乜鬼，點會最後益咗棋哥遲來先上岸。
問棋哥有乜發展大計，皆因政府迫佢哋○七年要全面數碼化，棋哥咪同政府斟緊囉，亞視今年唔搬，明年都要搬，反正廣播道塊地𠵱家好值錢。
新聞台成功開檔，聽講亞視新聞部副總裁唐德全就遞上辭職信，下個月正式離開。佢老頂關偉話，阿唐喺亞記都做咗五年，好攰想唞唞喎，高層多次挽留都唔成功，冇法啦。
至於阿唐去向，無記新聞部最關注，有人問過袁志偉，佢話冇聽過唐德全會去TVB，大家唔使驚。
（圖）蔣麗芸（左）原本想蹺住陳永棋隻手影相，但最後都冇咁做。
傳真︰2623-9278
電郵︰