前晚歐冠盃重有場皇馬對祖記嘅大戰，結果皇馬憑住上半場，碧咸開出罰球畀隊友希古拉頂入，以一比○勝出。賽後皇馬主帥盧森貝高就透露，賽前係特登閉門咁演練呢種罰球戰術，做咗三、四十次綵排，所以呢場佢哋贏波係應得嘅。
我求大俠嗰晚睇波亦見到，比賽末段皇馬又得到左路罰球，六大天王之一嘅施丹重即刻走埋去準備主踢嘅另一天王碧咸身邊，同佢咬耳仔好似教路咁，睇嚟罰球戰術將會係皇馬最新殺着。
呢場波亦有尼維特呢位前度歐洲足球先生傷癒復出助陣祖記中場，重一開波就唔覺意踢傷咗皇馬後衞沙加度；結果入替沙加度嘅巴禾，之後咁啱又令到尼維特傷出，呢個「三角關係」都幾有趣。
利物浦前晚亦喺歐冠盃贏波，主場大勝利華古遜三比一；雖然賽前傳出利記多位主將唔出得，但仍然攞到好成績，功臣包括中場比斯肯。利物浦睇怕要重新考慮之前話唔同呢位季尾約滿嘅球員續新約嘅決定嘞，不過係出手就要快，對面利華古遜之前亦透露過想免費簽入佢㗎。
阿仙奴嘅費比加斯，為咗「回饋」母會巴塞，專登幫佢哋做車路士「間諜」，喺噚晚場歐冠盃巴塞對車仔大戰前過料。包括叫巴塞小心車路士角球，龍門要盡可能出嚟打走個波，因為泰利頭槌好勁；重話洛賓及馬基列尼係重要人物，不過好似冇講林柏特，唔係連呢個都睇漏眼呀？
馬會就快開嘅巴西波，蠱惑波特別多。話說禮拜日柏蘭倫斯和恩比里奧二比二，當柏蘭倫斯落後一比二時，中場球員威廉射個波省中龍門邊廣告牌彈返轉頭，班柏蘭倫斯球員就當正入波咁慶祝；旁證同球證就睇唔清楚，結果信埋呢班「戲子」判入球，事後裁判就被罰。咁都得？
唔知係唔係因為明星賽期間啲球星玩得太盡，東西岸兩支明星賽前嘅長勝軍：奧尼爾同獲迪帶領嘅熱火，及由姚明同麥基迪領軍嘅火箭，噚日齊斷纜。首先有七連勝嘅熱火作客公牛爆冷輸波，另一邊八連勝嘅火箭又喺主場畀超音速贏兩分，搞到𠵱家只得活塞嘅五連勝最標青。
逢周一至周五見報